Litnet

Ek dink so aan Thomas, Chris en Angus en die ander agnostiese outjies hier rond wat dink hulle is slim, wanneer hulle neerhalend praat van God en sake Gods en dan verwys na ons ‘verbeelding’ wat dit alles kwansuis skep. Dit is natuurlik nie werklik ons verbeelding nie – net globale essensiële werklikheid kan só ervaar word. God is inderdaad globaal, God is onmeetbaar omvangryk – meteens!

Wanneer mens bietjie oor die saak dink, dan is dit mos omdat agnostici se hele verwysingsraamwerk wat op verbeelding funksioneer. Angus het al herhaaldelik hier vertel hoe verknog hy aan fabels en mites is – hy beskou álles só – selfs die God, die Woord! Daar is ook Johan Wiese wat verknog is aan verbeelding – hy verbeel hom weer hy is die duiwel self (hy verduidelik natuurlik dat sy duiwelse pseudoniem sommer ’n ‘troetelnaampie’ is – wat vir ’n verskrikking van ’n mens moet hy nie wees om só ’n ‘troetelnaam’ op die hals te loop, nie…) Só ook met hulle religie, die darwinistiese tipe evolusieleer.

Die evolusionis Richard Dickerson, skryf in die artikel, Chemical Evolution and the Origin of Life in die Scientific American (en die boek Evolution, dat, wanneer daar gesoek word deur die evolusionis in sy soektog na die biologiese ontstaan van die hiper gesofistikeerde reëlmatigheids- en ordeningsmeganisme wat die miljoene nie-lewende chemiese molekules (sure, alkalies, proteïene)in elke DNS sel, te orden in ’n baie spesifieke lewende chemiese biologiese orde, sodat die sel gedy daaronder, wat, as dit nie presies in die regte ordes georden word nie, verander in dodelike chemiese verbindings wat die sel sal vernietig eerder as versterk, die evolusionisme juis mank gaan aan die verklaring aan die ontstaan en bestaan van só ’n biologiese meganisme. Hy skryf verder dat die evolusioniste géén laboratorium modelle het wat dié kernkwessie kán aanspreek nie en dat hulle dus, wat neerkom op, eindeloos kan spekuleer daaroor in die afwesigheid van ‘lastige feite’ wat sulke spekulasie in die wiele sal ry en dat hulle op hulle verbeelding aangewese is, om te spekuleer oor hoe dit sou kon ontstaan het en waar dit vandaan sou kom, maar dat selfs die verbeelding nie behulpsaam is om só ’n leemte te vul, nie …

Maar die gelowige wetenskaplike het nie só ’n probleem nie.

Daar is die bekende vergelyking van die vliegtuig model. Daar word gesê dat ’n gewilde tipe passasiersvliegtuig bestaan uit ongeveer vier 4,5 miljoen verskillende onderdele, waarvan nie één kan vlieg, nie. Dus, as jy in die vliegtuig sit en jy besef dat jy nou moet vlieg in ’n ding waarvan nie ’n enkele een van die 4,5 miljoen onderdele kan vlieg nie en jy self ook nie en die loodse en personeel ook nie… moet liewer nie verder dink nie. Maar helaas, die produk van beplanning met elke enkele een van die bykans 4,5 miljoen onderdele elkeen op sy regte plek, die konstruk, die ontwerp, die uitvoering, kán toe na alles vlieg - nie inherent nie, maar weens die gespesialiseerde ordelike samestelling daarvan, is dit ’n sukses. En dié is die vrug van hoogs intelligente breinkrag. ’n Moderne vliegtuig se samestelling is in kompleksiteit te vergelyk met dié van ’n 500-stuk legkaart, wat uitleg en beplanning betref, teenoor ’n 22,200-stuk legkaart wat die kompleksiteit van ’n DNS sel se informasie uitleg en beplanning verteenwoordig (en ek dink ek doen dalk nou die kompleksiteit van die DNS sel ’n gróót onreg aan na die konserwatiewe kant toe).

Bykans niemand van ons weet wie die ontwerpers en vervaardigers is van die luukse vliegtuie waarin ons rondjakker nie. Maar wanneer ons die vliegtuig so beskou, of ons nou insigvolle leek of briljante wetenskaplike meganiese ingenieurs is, dan wéét ons – iemand met toepaslike kundigheid en vernuf het met sorgvuldige beplanning in die fynste detail dié aluminium voël uit 4,5 miljoen geselekteerde onderdele wat bymekaar pas, geontwerp en dit toe met groot sorg, daarvolgens aanmekaargesit, vervaardig, geskep. ’n Saak van noodwendige logika. Niémand by sy verstand, sal meen ’n orkaan of ses het 'toevallig' dié meganiese wonderwerk vermag nie.

Tog verwag die darwinistiese evolusionis dat ons soiets moet glo van ’n menigvuldige maal méér komplekse biologiese proses soos die samestelling en ontstaan van die DNS. Jurie Van Den Heever en kie verwag dit van ons en van sy arme studente, om deel te neem aan die onvolwasse verbeeldingsvlug, die mite , die fabel, dat die mitologiese god van toeval, dié biologiese wonderwerke kon verrig. En as jy nie glo in die verbeeldingsvlug nie, word jy straks persoonlik aangeval en as jy hulle student is, druip jy jou vak!

Nie net geloof nie, maar inderdaad rede en logika, noop mens om te besef dat die lewe met die Goddelike ultra-Intelligensie geontwerp en geskep is.
Waar op deeske aardbodem kom die evolusionis daaraan dat só ’n kompleksiteit sommer net so as gevolg van lukrake, toevallige wat-ook-al gebeur? Nét in sy verbeelding, binne die raamwerk van die fabel wat hy vervaardig – soos Dickerson dan ook bevestig.

Die darwinis in watter bekleding daarvan ook al, maak stééds as evolusionis aanspraak op ‘onomstootlike bewyse’ vir hulle teorie.

Ons vra van hulle, om mee te begin, van dié wat die aanspraak daarop gemaak het – Stephan, Angus en veral Jurie Van Den Heever, onomstootlike empiriese wetenskaplike bewys van net één aspek – hoe die eerste lewe ontstaan het, sónder dat dit sorgvuldig geontwerp en geskep, is. Want álles wat hulle beweer, is daarop gebou.

As hulle dit nié kan bewys nie, is hulle mos wanvoorstellers. Dan is julle gevangenes van julle eie verbeelding.

Groete,
Kobus de Klerk