Caster Semenya

  • 0

Ek stem saam dat die instansies betrokke by die besluit oor Caster Semenya ’n lat vir hulself gepluk het, maar nie om die simplistiese rede wat deur Jan Rap gegee word nie – veel eerder omdat gender-aktiviste als in hul vermoë sal doen om die besluit ongedaan te maak.

By enige en elke sportsoort waar daar kategorieë bestaan wat gegrond is op byvoorbeeld ouderdom, gewig of enige ander getal kan mens soortgelyke oppervlakkige argumente aanvoer waarom iemand wat sê nou maar 100 gram te swaar is of een week te oud is nie in ’n ander, mindere kategorie mag deelneem nie. Indien hierdie argumente ernstig opgeneem word kan mens dan maar geheel en al wegdoen met alle sodanige kategorieë.

Sulke argumente berus voorts ook op onkunde oor testosteroon. Soos die toeval dit wil hê is die afsnypunt in die betrokke atletieknommers vir die hoogste toelaatbare T-vlak in vroue 5 nm/l. Die vlakke van hierdie hormoon wissel egter geweldig tussen geslagte, binne geslagte en ook na gelang van ouderdom en tot ’n mindere mate na gelang van omgewing. Self so is ’n syfer van 5 nm/l besonder tegemoetkomend want T-vlakke by meeste vroue wissel van 0.5 tot 1.8 nm/l. Mans, daarenteen, se T-vlakke na puberteit wissel van 7,7 tot 35 nm/l. Sover dit T-vlakke betref is dit is dus hoegenaamd nie ’n kwessie van ’n “oorgang van petite na robuust” wat “geleidelik” is nie. Die afsnypunt van 5 nm/l is om goeie redes gekies en nie, soos Jan Rap skynbaar dink, omdat iemand van mening was dat 5 ’n oulike getal is nie.

Daar is verskeie toestande by vroulike atlete wat verhoogde T-vlakke tot gevolg het, interseks ingeslote, en waaroor ek nie wil uitbrei nie. Genoeg (hopelik) om te noem dat testosteroon ‘n anaboliese steroïed is waarvoor algemeen getoets word.

Om dus te vra wat Billy Jean King, Serena Williams en Navratilova se T-vlakke is/was is sinneloos omdat atlete almal vir hierdie substans getoets word en omdat hierdie toetse onderskeid kan tref tussen anaboliese steroïede wat ingeneem word en dié wat deur die liggaam self vervaardig word. Ek weet nie wat hierdie dames se T-vlakke is/was nie, want soos Semenya s'n is dit nie bekend gemaak nie. Maar indien dit verhoog was sou hulle beslis die gevolge daarvan moes dra.

Voordat allerhande uitsprake gemaak word behoort daar eers so bietjie navorsing oor ’n onderwerp gedoen te word. Onderstaande skakel is ’n goeie beginpunt:

https://quillette.com/2019/05/03/a-victory-for-female-athletes-everywhere/

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top