Litnet

Wat ‘n verleentheid ...

... dat slegs 5 138 mense Front Nasionaal gestem het! Is dit nou nie ‘n duidelike manifestasie van die Stockholmsindroom nie? Indien nie dít nie, is dit skreiende naïwiteit; hier’s die Amerikaanse spreekwoord oor die kalkoen en Kersfees 100% van toepassing.

Mens sou nou dink dat, met die dat Afrikaans en Afrikaners so afgejak word, hulle (dit is nou die Afrikaanse kiesers) ‘n boodskap aan die regering sou wou gee, iets soos ‘skei uit, hande tuis, ons is gatvol.’ Maar nee, daar gaan staan en stem hulle toe vir volgehoue vervolging en verkragting van Afrikaans en die Afrikaner.

Wat ‘n verleentheid om die peil van insig van die wat Dan Roodt so uitkryt gade te slaan. Een ou skryf vir hom (sien Jaco se skakel) dat die “ ... DA is werklik die enigste manier om die barbare te stop.” Indien die ou met ‘barbare’ die regering bedoel; besef die stommerik nie dat die DA in effek die party was wat die regering in die saal gesit het nie?

Wat ‘n raaisel, en ‘n skande, dat ouens soos Dirk Rigter en Jaco Fourie hulle so verlekker in die Afrikaner se verwerping van ‘n volksgenoot wat sy nek uitsteek om die vervolging van Afrikaans en die Afrikaner uit te wys en ‘n einde daaraan te maak. Soos die breingespoeldes wat moddergooi (sien die skakel) bring hulle niks substansieel na die spreekwoordelike tafel toe nie, hulle speel net die man in plaas van die bal.

Daar kan net een rede vir hierdie irrasionele optrede wees; Dan Roodt se handelinge stel hulle in die verleentheid, beklemtoon die feit dat hulle die verkeerde perd opgesaal het en hierdie aaklige bed opgemaak het. Die morele moed ontbreek om te erken hulle was met slap pap onder ‘n wip gevang en al wat oorbly is om die boodskapper te stenig en voort te gaan met die charade.

Daar is een troos; mense verdien die regering wat hulle het. Ek kry dieselfde gevoel soos wanneer die Cheetahs, ‘n punt of drie voor, balbesit wegskop in die laaste minuut en dan juis daarom verloor; die verlies is nie so moeilik om te verwerk as hulle só dom speel nie, dan móét hulle maar verloor. Dit skyn of die grootste gros van ons Afrikaners smeek om afgejak te word en, almal wat kapsie maak daarteen, word verguis. Wat ‘n donnerse verleentheid.

Groetnis van nommer 5 138 (moet wees want as ek nie gestem het nie was daar net 5 137)

Jan Rap