Litnet

Dagsê Dirk

Dis nou al meer as een keer dat jy my van 'rasverhewendheid' beskuldig het. Ek neem aan jy bedoel daarmee dat ek rassisties is of, anders of dalk terselfdertyd, dat ek reken dat een ras beter as die ander is.

Nou laat ek jou nou 'n ding vertel; dit is nie so nie. Ek is op rekord hier, meer as eenmaal, dat ek nie dink een ras, of sê maar volk voor iemand nou dáároor tangensiaal wegvlieg, is slimmer (of beter) as 'n ander een nie alhoewel daar ouens is wat sê navorsing bewys anders (maar, soos jy weet, neem ek alle navorsing met 'n goeie skeut sout). So glo ek dan dat die wittes nie slimmer as die swartes is nie of dat die Semiete of Asiërs slimmer as wittes is nie.

Ek sien swartes oor die algemeen as gemoedelik, vriendelik en mededeelsaam. Ook as vindingryk en kunstig. Ek was al uitgekryt as 'n k-boetie wat ook nie waar is nie. Een swart kollega het soort van 'n vriend geword want ek was al by hom aan huis en hy by my. Ek werk al jare aan hom om saam met my HNP te stem en hy sê nou die dag vir my hy's nog nie daar nie maar hy het darem al uit die ANC uit na COPE toe beweeg.

Daar is wel volke wat beter presteer as ander en hoekom dit is kan 'n groot debat word maar ek glo die rede is hoofsaaklik leierskap en dissipline, spesifiek selfdissipline. Maar nou ja, dis 'n ander debat; die punt is ek beskou die Boere verhewe bo niemand en niemand verhewe bo die Boere nie.

Ek het wel my gunstelinge, soos die Russe byvoorbeeld. Ek weet nie eintlik hoekom nie, seker maar oor dit lekker is om ruimte-apparatuur, enige masjinerie eintlik, te sien wat nie Engels op het nie. Ook die Portugese, seker maar oor die kos en die lekker tye wat ek in Mosambiek voor 'vryheid' gehad het. Ek het baie respek vir die Duitsers en die Japanners oor hulle werk dat dit gons; daar kry jy nie sommer stukkende goed nie. Ek hou ook van die Engelse, seker maar oor hulle flieks en letterkunde. En van die Amerikaners (veral generaal Lee se mense) en die Skotte oor hulle whisky en omdat my een oupa een was en van die Iere omdat my een ouma een was.

Alhoewel al my ander voorouers Hollanders was is ek nie so gek na hulle nie; ek voel ons was half in die steek gelaat deur hulle met die nou dat hulle so ywerig aan 'bevryding' gewerk het en André Rieu nie Afrikaans wou praat met sy konsert hier nie. Om dieselfde rede hou ek ook nie van die Dene en Swede nie en ook nie van al daardie nasies wat renosters stroop nie.

Maar ek dwaal af; wat ek wil sê geen ras/volk is verhewe bo 'n ander nie. Almal het potensieel dieselfde vermoëns en daarom is 'opheffing' vir my 'n paternalistiese begrip. Die oomblik as jy praat van opheffing beteken dit jy reken jy as opheffer is 'n trappie hoër as die een wat jy wil ophef. Buitendien, daar is 'n spreekwoord wat sê gee 'n man 'n vis en jy stil sy honger vir een dag; leer hom om vis te vang en hy put sy en jou visbronne uit, tjop tjop.

Jan Rap