Gooi blomme eerder as bomme!

  • 2

Dit is my nou reeds bekende WP-ondersteuner en buurman Hans se kalmerende inisiatief na die CB-katastrofe en sy ontnugtering met die anti-klimaks op Nuweland.

Ek het hom genader om verder oor sy verskillende liefhebbery te skryf en tydens my formele onderhoud met Hans oor sy liefde vir blomme het ek so terloops in die heen-en--weer-loop gemerk dat die bordjie met 'n streeptrui en die woorde: "WP jou lekker ding!"-- vermoedelik as reaksie op die CB- Finaal  katastrofe -- as nagedagtenis of uit weemoed óf  woede op die agtergrond tot agter die digte proteabos verskuif is.

Hans is naas sy "belangstelling" in rugby bo alles 'n paradysmens   wat vernuftig met blomme in swart plastiekhouers  én  woorde op tuinbordjies goël.

Sy agternaam of van, vol geheime assosiasies en frustrasies, bly immers  ten ene male: "Van Eeden" en enige verwysing na verlore paradyse soos Nuweland of Elders word beantwoord  met 'n kortaf: "Boe!" of  "Ba!"

Sy liefde vir blomme word in ooreenstemming met sy voorkeur vir "groen" politiek dmv aforismes en ander pittige sêgoed op sy reklame-tuinbordjies @ R10 elk by Saterdae en Sondae se vlooimark op Koningstrand  hard en duidelik as: "I love my garden!" geadverteer én geproklameer.

En as "groene" steek hy sy politieke gevoelens dan ook nie  onder stoele en tafels, of  'n army-jas as dit koud is, weg met sy hoof bord wat onomwonde sy gevoel vertolk nie:  "Kill the bastards: Let the rhino live!" (met permissie gesê)
.

Dat Hans soos Adam versot is op sy tuin, maar ter wille van versoekings geen vrugtebome kweek of plant nie en dat hy dit algaande soos dit 'n Van Eeden betaam in 'n lushof omskep het, is vir elke verbyganger 'n waarheid wat duidelik met blomme bevestig is.

En dan is sy tuin g'n paradys van weleer nie maar 'n Eden- van- hier-en-nou wat betitel is met 'n bordjie waarop die sinistere  waarskuwing  byna soos by die ou Russiese Sone se blokkadestasie in die eertydse verdeelde Berlyn in dik swart letters uitgebulder staan : "Jy betree nou die Tuin van Eden in klein formaat! Moet asb nie vloek of raas nie en praat sag en welvoeglik."

Ons eerste  stop was by die "olifantvoet", na bewering, soos die destydse selakant vir prof Smith van Rhodes, 'n anakronistiese kaktus-spesie van Japan uit die uitgestorwe dinosouriërs-era.

My oog val onwillekeurig op die keurige heldergeel tapyt van  grondbedekking  wat hy op eie houtjie  "Aspoestertjie se goue lokkies of klokkies (maak jou piek!)"   noem.

Ander gunstelinge is sy reeks vetplante waarvan hy die miniatuur-alwyn uitsonder wat, hoewel nie 'n bonsai nie, niks hoër as 30 cm groei nie en soos 'n Wellingtonse vryer alles het wat dit moet hê.

Op sy blomryke voorstoep gaan sit ons nou vir tee onder die kou van  sy pratende "lovebird"  wat al halfpad geleer het om skril vir verbygangers en besoekers "Don't worry! Be happy" te skree.

Hans se ideaal is om vir sy vrou Irene,  net so lief  vir blomme  en 'n baasrangskikker, 'n besigheid  as bloemiste in die Somerstrandse besigheidskompleks te begin.

Hans ontwerp en vervaardig voorts allerlei kontrepsies soos voëlvoerders, broeihokke en versamel herwonne weggesmyte artikels en houers vir sy blomme soos ou plastiese skoene en gebarste kruike waarvan hy byvoorbeeld die een "Rachel se kruik" en die skoen "Malema" noem.

In "Malema", vir kort, verplant hy  'n kleurvolle blom en gee terselfdertyd aan die skoen en Malema  'n nuwe romantiese voetsoolvlakstatus.

'n Nuwe wending was die gebruik van pittige blomme-, natuur- en dierebeskerming sêgoed en ander twyfelagtige aforismes op tuinbordjies in groot letters soos: "Slaan nooit eerste nie" en in kleiner letters onder: "draai eerder die ander wang!"

En dan is daar borde met die ietwat verslete: "Make love not war" en die afgesaagde "Sê dit met lewende eerder as afgeplukte blomme" waarvoor sy vrou as  aspirerende- of kandidaat-bloemiste nie juis hoë waardering het nie.

Die opskrif van hierdie stuk is my persoonlike gunsteling onder die praatborde: Dit het 'n vredesmotief en propageer: "Gooi blomme eerder as bomme" met onder aan: "Leef kleurvol en geurvol eerder as gatvol -- met blomme"!

Hy het ook een wat polities proklameer sonder om egter skynbaar die dubbelsinnigheid of toutologie daarin raak te sien: "Stem Groen:  vir alles en almal wat "groen" is' " en: "Vervang kernkrag met blommeprag!"

Hans glo ten slotte aan blomme of blomblare as die sagte en waardige uitdrukking van meegevoel en as verganklikheidsimbool by 'n teraardebestelling en is in beginsel teen die geykte  adieu van die alliterende "kluitklap op die kis" soos in ons eertydse volkslied!

G'n wonder hy en Jan Blom, alias Breyten Breytenbach, se broer Basjan was saam in Wellington op  skool nie.

Hy sê: Liefde vir blomme is soos liefde vir woorde en vroue  'n erg  aansteeklike siekte!

Terwyl ek ingedagte uit sy herwonne paradysie wegstap, hoor ek hoe Hans die wysie van: "I never promised you a rose garden"  neurie.

En terug op sy gemakstoel in die koelte onder sy stoep se kruipers sit hy onder die papegaai se kou met sy hupse  hempuitse kaal bolyf en slaan  soos op 'n wafferse "LM  trefferparade" oor  na "Red roses for a blue lady".   'n Kort rukkie later hoor ek hoe fluit hy lustig die wysie van "Tulpe uit Amsterdam".

Dis nou die anderkant van die WP-rugbykant van my buurman- vriend Hans! Van Eeden!

Humphries du Randt

  • 2

Kommentaar

  • Humphries, dankie vir 'n besondere bydrae.

    "Make love not war" is 'n afgesaagde uitdrukking wat die blommekinders in die 1960's populêr gemaak het. Wil tog iets hierby voeg. Dit was ook in die sestigerjare en in Mosambiek was daar 'n wilde Portugese vegvlieënier en op sy helmet het hy geverf: "Make love and war".
    George

  • Ek het mos al die tyd die gesegde gehad, Afrikaanse vertaling vir die " make love not war", steek maar moenie doodsteek nie.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top