Litnet

Dirk, nie alleen het jy die korrespondensie gevolg nie; jy het deelgeneem. Jy het egter verkas na my antwoord op jou aardskuddende coup de grâce naamlik “ ... die tyd van suiwer Afrikaans is vir ewig verby” of so iets (met die nuwe SêNetformaat is dit moeilik om jou (of my) presiese woorde te kry aangesien mens nie kommentaar kan ‘soek’ nie). My vraag daarop was “ ... verby soos veilige plase, strate, dorpe, stede en parke, skoon strande, funksionerende dienste ens verby is?” en jy het geswyg soos die graf.

Jy reken my refrein is elke keer dieselfde, naamlik dat die land in ‘n gemors is. Miskien, maar dis in antwoord op julle refrein dat alles nou wonderlik is en goddank die land is uit die ‘bose wittes’ se hande uit. Maar ek praat tevergeefs met julle; julle sit en harp speel en besing die kaal keiser se wonderlike teknikaller droomkleed terwyl die land brand.Maar hoe anders, die verlede móét as boos uitgebeeld word om bestaansreg aan julle ‘bekering’ te gee.

En ja, PW wás liberaal (hoekom dink jy het partye soos die HNP en KP ontstaan?); hy sou dieselfde pad as FW geloop het maar miskien net stadiger. En daar wás ook nie die apartheid wat julle voorhou sou bestaan het nie naamlik dat die Afrikaner ‘n onderdrukker en uitbuiter was. Julle moet egter volhou met hierdie leun want dit verg te veel morele moed om te erken julle is vir suckers gevang.

Jou stelling dat ek die ou is wat nie weet van liberaal of konserwatief of links of regs in die politieke konteks nie is dus verkeerd; jý is die een in ‘n dwaal. Jy sal ook meer moet omskryf wat jy bedoel met jou stelling oor die “ ..skade van apartheid ... ook aan die nalatenskap van ons as Afrikaners” want die apartheid in jou kop, naamlik dat Afrikaners onderdrukkers en uitbuiters was, is ‘n hersenskim en die “nalatenskap aan ons Afrikaners” is dus ‘n hersenskim gebaseer op ‘n hersenskim. Die sak waarin jy sit en die as wat jy op jou kop gooi is koerant- en/of selfgeïnduseerde skuldgevoel. Maak oop jou oë; die waarheid maak vry.

Jammer om jou borrel te bars oor die ISS maar dis presies die oukoeistorie waarvan ek praat; verboos die verlede om die teenswoordige gemors te regverdig. Die sogenaamde inligtingskandaal was glad nie ‘n skandaal nie – indien wapens gekoop was in plaas van te gepoog het om ‘n koerant te koop sou niemand gehuil het nie. Die ‘ander kant’ het geen klip onaangeroer gelaat in hulle verdagmakery nie en naïewes, soos jy, het hulle stories met sinker en al gesluk. En, soos ons nou sien, is julle verplig om met ‘n charade voort te gaan.

Om boikotte te omseil is nie korrup nie, dis oorlewing; hoe kan dit nou enigsins korrup wees om ‘n ou se vingers van jou keel af te haal as hy jou verwurg? En as Nic Diederichs naastenby so korrup was sou hy nie ‘n byna bankrot boedel agtergelaat het nie. Wat die BSB en Lang Hendrik betref, hulle het ‘n joppie gehad om te doen waarvan die uitsette soortgelyk was aan die van MI5, MI6 (SIS), die CIA, die KGB en soortgelyk. Dit regverdig natuurlik nie onreëlmatighede nie.

Jy noem die Smitmoorde asof dié gepleeg sou gewees het deur die ou bedeling. Dink weer; die inligtingsbom wat hy kon bars het dalk die totale aanslag ontbloot (wat altyd afgelag was deur die anti-Afrikanerfaksie).

Jy sê die “ ... die rede vir [jou, Dirk se] skrywe, wat Jan Rap eintlik tussen die lyne te kenne gee, is dat die vorige bedeling dan nie so ‘n gemors was soos nou nie, nie korrup was soos nou nie.” Jy’s verkeerd; ek sê dit nie tussen die lyne nie, ek konstateer dit kategories. In die vorige bedeling (wat so 1970 se kant tot ‘n einde gekom het) was daar nie 30 opstande per dag nie, was plaasboere nie met eentonige reëlmaat vermoor nie, was daar nie beurtkrag nie, het rioolplase gewerk, was dorpe en stede nie toiinrig nie, was Afrikaans ‘n amptelike taal en het die Rand nie afwaarts getuimel nie. Hospitale en klinieke was skoon en het gewerk. Universiteitstudente het nie nodig gehad om onder polisiebegeleiding klas toe te gaan nie, kampusse was nie vol staalheinings nie en klasse was in Afrikaans en die standaard was van so’n aard dat gegradueerdes ‘n bydrae kon lewer. En dis alles maar onder andere.

Ek hoef jou nie na ‘n webwerf te verwys om my stellings te staaf nie; jy hoef net bloot om jou rond te kyk, die skille van jou oë af te haal. Jou verweer, regverdiging vir die huidige sirkus, naamlik dat mense nie in hulle geboorteland kon stem nie is absurd (ek het jou al gewys hoekom). Die standaardverskoning wat jy aanhaal uit Business Day, naamlik dat dit normaal is vir regeringsverandering, is belaglik flou: ‘n Regering word mos juis omvergegooi omdat hy nie ordentlik funksioneer nie; om dié nou te vervang met een wat glad nie werk nie hou net nie water nie.

So, ek sê weer, maak jou oë oop en klim uit onder die hipnose; die waarheid bevry.

Jan Rap