Litnet

Nou wie sou dit nou kon gewees het? Dog eers (so met die eerste hierjy-staan-opsy stanzas), maar ek hét mos al gehoor van hierdie "Breyton"-vent (véraf aangenaaide familie het nie skoolopleiding gehad nie; spel dikwels krom), en toe sien ek laer en later dit gaan gelukkig oor ene "Breyten" vir wie ek van g’n Adamskant ken nie. Selfs ’n kommunis het sy druthers en smaak. En beginsels. Maar ek verneem dat hy vreeslik grootbek is (seker maar soos dit 'n verloopte kameraad betaam), orals en oor alles 'n eiertjie te lê, siestog. Solank hy maar net agter die woorde kan wegkruip. Is ek reg as ek vermoed hy soek 'n joppie by Sjymbos Joeniewersitie? Gelukkig vat niemand hom kop toe nie.
Maar wie sou die "Olga" wees? My vrou se oudste suster - lewe nog (ook maar net) - ’n baie streng oujongnooi met ’n sagte hart so groot soos ’n ganse verlore (’skies) verlede - se naam is Olga. Nou wat op aarde sou Grootsus Olga (sy’s ’n goeie pianis, maar goddank probeer sy nie sing nie), wat regtig nie avontuur-lustig is nie, al het sy ook toe sy jonk was haarself "Ana" laat noem, en bang is vir muise, in daardie gedig loop soek?
So van name gepraat: ek hoop die stomme Breitoon het toe nie vir hom een van daai onuitspreeklike Poolkse name gaan kies as koesnaam nie - want soos húlle darem kan mors met ’n alfabet is net nie te glo nie!
(NS: Die saamgaande foto van die kanaal in Moskou is darem maar mooi, né? Mooi was nog nooit lelik nie. Ek hoop Poetin onthou om vir my, sommer so saam met ’n trossie gelowige pelgrims - ek sal my nie opdring nie, maar ter wille van old times' sakes - nooi om die keistene te kom soen voor dit te laat is. Hy is nog perdfris en lig op sy gebreide voete, en hy loop nog mooi met daai matroserige swaai van die skouers sommer so straight met ’n jakkalasdraai of twee uit ’n Russiese film, en dit met net ’n paar knarsies vodka agter die blad (wil gedóén wees!) - ag, en dis so lieflik wanneer die soldatekoor begin sing, ek huil sommer saam - maar hy sal mos nie vir ewig kan lewe nie? Of wat praat ek alles?)