Litnet

My prediker my hoogleraar in fiksie het my gewaarsku
 
teen vrypostige voëls wat op niksvermoedende koppe kom kak
 
in die skadu & skuilte van bome
 
& inbreek op die orde om nes te skop in ’n strooikop-
 
vlieg voëls, loop & swem voëls
 
gek(lik), dwaas, getik, in die bol gepik niksbeduidende
 
raas voëls, aas & baas voëls
 
klaar die heil by kerktorings ingewag,
 
klaar gesuf voor selfbeheersde buddhas
 
wat bid & bewe soos vet kerse voor die sondesmous.
 
Penningmeester speel is grieks vir my,
 
ek het tyd gekoop
 
& diens my dividende met sentimente:
 
helfte vir my helfte vir die repeterende res
 
vrek die perpetueel pendulende lot
 
leë hande van vredeliewendheid
 
tussen kettingwinkels & glo-bla-bla-bla-liseer die pes.
 
Ek sal opsteek brandsteek doodsteek vir my
 
a. Doel b. Vryheid c. Huiseienaarskap.
 
Ek het my eie vierskaar voëlverskrikkers prakseer:
 
die waterdraer kyk noord & skil die oë van ’n waterslang,
 
die landbouer spit die weste in,
 
die maaier neem die sekel op in die suide,
 
die saaier bring distels & dorings tot die ooste.
 
Heil die landhere van afwagtende grafte
 
die opsigters van stof,
 
die giergode sat van goed
 
onderskryf deur ingeteelde venstermannekyne.
 
Memeseer die massas met misse!
 
Die serienommerpas-bekwaamde fratse moet dans vir die sweep,
 
laat korale die ritmiese prosessie van volhoubare verval begelei
 
as nog heilige woorde van geen antwoord se vernis afdop.
 
Adriaan