Blomme teen die mure
Dis Sondagmôre net na ag
Die eerste Mowbray taxi’s toet
en versnel na die dag se goed …
Kruis nog ’n wegloopkind die straat
met ’n swik en ’n sonneblomlag.
Refrein
Die hele plek is nou traliegehek
Ken jy nog die bure?
Die taxi-toeters skel ’n encore
vir die blomme teen die mure …
Die pankopman met die kruk
hink nader met ’n dag se moed
uit Stasiestraat; rus sy horrelvoet
voor Zair’s Fast Food & Fisheries –
die Halaalkosyn om teen te druk.
Herhaal refrein
Die ’lektric box couple leun skeef;
hul bene nog styf van die dou –
vir brekvis straatstories herkou …
Hul gape is donker gate
Ou losers weet dis fight vir oorleef.
Herhaal refrein
Die ou op high wat mik en stop;
onder sy blad knyp hy sy brood –
met spirits systap hy die dood
digby die Salvation Army …
Hul bord sê die Thrift & Gift Shop.
Herhaal refrein
Kyk maar weer, laat jou hart versag
voor die eerste Mowbray taxi’s toet
en versnel vir die dag se goed …
Dalk kruis ’n wegloopkind die straat
met sy swik en ’n sonneblomlag.
Nuwe refrein:
Al is die plek ook nou traliegehek
Al ken jy nie die bure
Die taxitoeters skel ’n encore (mm … mm)
Die blomme rank al teen die mure.