Litnet

Nandi Victor (nee Burger) het in 2013 aan die Hoërskool Ben Vorster in Tzaneen gematrikuleer. Sy het ’n Baccalaureus Artium in 2016 aan die Universiteit van Pretoria verwerf en in 2017 haar Nagraadse Onderwyssertifikaat aan dieselfde universiteit verwerf.

In 2018 het sy as au pair in Nederland gewerk, waar sy ’n groter belangstelling in die Nederlandse taal ontwikkel het.

Sy begin in 2019 as onderwyseres by Hoërskool Riebeeckrand in Randfontein skoolhou, waar sy Afrikaans Huistaal aan Graad 8’s en 10’s en Afrikaans Eerste Addisionele Taal aan Graad 9’s onderrig het. Sedert 2020 gee sy onderrig in Afrikaans Huistaal aan Graad 10’s en 11’s by Hoërskool Noordheuwel in Krugersdorp.

In 2023 verwerf sy haar honneursgraad in Afrikaans en Nederlands aan die Universiteit Stellenbosch.

Nandi het ’n passie vir Afrikaans, sowel as die onderwys, en haar navorsing is uit die aard van die saak gerig op onderrig. Haar navorsing fokus op kwessies in die onderwys en dit word gerugsteun deur haar eie ervaring as onderwyseres. Met haar navorsing wil sy graag ’n verskil maak in die onderrig van Afrikaans, asook aan Suid-Afrika se sukkelende onderwysstelsel in die algemeen.