Marlene Botes
Marlene C Botes is al meer as 30 jaar deurmekaar met belasting op toegevoegde waarde (BTW). Nadat sy BCom (Regte) (1985) en LLB (cum laude) (1987) aan die Universiteit van Pretoria behaal het, doseer sy vir twee jaar handelsreg by Unisa. In dié tyd byt die BTW-gogga terwyl sy navorsing doen oor internasionale BTW. Sy sluit by die hoofkantoor van Binnelandse Inkomste (tans die Suid-Afrikaanse Inkomstediens) aan waar sy deel is van die span wat verantwoordelik is vir die implementering van BTW. Daarna werk sy in die BTW-afdeling en verteenwoordig ook die SAID in die Belastinghof. Tussendeur verwerf sy haar LLM (Belasting) aan Unisa, maar toe sy besef dat sy haar jong kinders se grootwordtyd mis, verlaat sy die SAID.
Sy werk as onafhanklike BTW-konsultant en is al vir ’n paar jaar op ’n ad hoc-basis betrokke by die BTW-komponent van die Universiteit van Pretoria se MCom/LLM-program, onder andere as eksterne eksaminator. Sy skryf Juta’s Value-Added Tax, wat in 2000 verskyn en jaarliks opgedateer word, en is sedert 2000 betrokke by die IBFD se “International VAT Monitor”, en later ook “VAT Worldwide”. Later sluit sy by PricewaterhouseCoopers se BTW-afdeling aan, maar besluit ná 10 jaar om (weer) kantoorure vaarwel toe te roep. Siende dat die BTW-gogga nog nie tot ruste gekom het nie, is sy egter steeds doenig daarmee. Sy skryf, onder andere, VAT − An Introduction (Juta) en verleen so nou en dan BTW-ondersteuning aan rekenmeesters wat geregistreerde belastingpraktisyns is.
Aantekening: Denkbeeldige insetbelasting op tweedehandse vaste eiendom: Te goed om waar te wees, of nie goed genoeg nie?
2022-07-26"Aangesien die Belastinghof oortuigend beslis het dat denkbeeldige insetbelasting ook op hereregte bereken kan word, word aanbeveel dat die BTW-wet gewysig word sodat vergoeding nie hereregte insluit nie en sodat ’n BTW-ondernemer die hereregte op die aankoop van vaste eiendom, vir belasbare doeleindes, as ’n aftrekking op sy BTW-opgawe kan eis."
BTW, belasting en die toerismehuisvestingsbedryf: ’n onderhoud met Marlene Botes
2022-03-02"[E]lke verhuurder van ’n huis of ander blyplek moet hom deeglik van BTW vergewis. Aangesien verhuringstransaksies van mekaar verskil en die verhuurder se ander bedrywighede ook ’n invloed op sy BTW-registrasieverpligting kan hê, is dit noodsaaklik dat ’n verhuurder by ’n geregistreerde belastingpraktisyn aanklop ten einde sy BTW-risiko’s te bestuur."
Aantekening: Verhuring van ’n huis: Wanneer die SAID met hul BTW-koffers mag kom aanklop
2021-11-22"’n Verhuurder wat in die verlede versuim het om uitsetbelasting te verklaar en nou sy sake in orde wil kry, moet sy transaksies noukeurig ontleed om te bepaal of BTW-registrasie inderdaad nodig is en, indien wel, van wanneer af."
Vonnisbespreking: BTW-toedeling van dienste gelewer aan nie-inwoners
2020-11-09"Die doel van die BTW-wet is nie dat ’n nie-inwoner, wat nie die finale verbruiker van goed in Suid-Afrika is, ’n BTW-koste moet oploop nie. Daarbenewens vereis die struktuur van die BTW-wet nie dat ’n BTW-koste moet ontstaan waar produkte weggegee word om goed, wat ingevolge ’n belasbare lewering verkoop gaan word, te bemark nie."