Litnet

Jan Sebastian Rabie is op 14 November 1920 op George gebore. Hy matrikuleer in Riversdal en verwerf in 1945 ’n MA-graad in Afrikaans en Nederlands aan die Universiteit van Stellenbosch. In 1948 vertrek hy na Parys en vir die volgende sewe jaar is dié stad sy basis. Die tydperk het ’n belangrike invloed op sy skryfwerk én sy lewe, want dis waar hy die skilderes Marjorie Wallace ontmoet met wie hy in 1955 trou. Met hul terugkeer in Suid-Afrika bly hulle in Groenpunt en werk hy by die SAUK. In 1966 vertrek Jan en Marjorie met ’n Carnegie-beurs na Amerika en reis weer rond en woon vir drie jaar op die eiland, Kreta. In 1970 gaan woon hulle op Onrus totdat Jan op 15 November 2001, ’n dag na sy 81ste verjaardag, oorlede is.

Jan se eerste roman, Nog skyn die sterre, ’n verhaal oor die Groot Trek, verskyn in 1943. Dit is egter sy kortverhaalbundel Een-en-twintig wat in 1956 verskyn, wat al beskryf is as “’n waterskeiding in Afrikaans” en volgens André P Brink “die loop van die Afrikaanse letterkunde verlê het”. Jan was ook betrokke by die Afrikaanse Skrywersgilde en in die stryd teen sensuur.

• Foto: NB uitgewers