Litnet

Corné Mulder behaal sy BIuris-graad aan die Potchefstroomse Universiteit vir CHO in 1980, met politieke wetenskap en internasionale politiek as ekstra hoofvakke. As student was hy onder andere ’n lid van die studenteraad.

Hy voltooi ’n LLB-graad in 1982 met onderskeidings in verskeie vakke. Daarna het hy navorsing by die Instituut vir Gevorderde Regstudies van die Universiteit van Londen en die Max-Planck-Institut für ausländisches öffentliches Recht und Völkerrecht te Heidelberg, Duitsland gedoen. Hierdie navorsingsperiode was ondersteunend tot die voltooiing van 'n doktorsgraad in staatsreg (LLD) wat hy in 1984 op die ouderdom van 26 behaal het.

Nadat hy in 1987 as prokureur van die Hooggeregshof toegelaat is, is hy in 1988 as parlementslid vir die kiesafdeling Randfontein verkies.

Hy is ’n stigterslid van die Vryheidsfront en word in 1994 as parlementslid herkies.

Hy is ’n lid van die portefeuljekomitee vir buitelandse sowel as binnelandse sake.

Mulder was betrokke by die skryf van die Suid-Afrikaanse Grondwet as lid van die Grondwetlike Komitee van die Grondwetlike Vergadering.

Na die 1999-verkiesing word hy as hoofsweep van die Vryheidsfront aangewys.

Hy het uitgebreide buitelandse reise vir navorsing- en studiedoeleindes onderneem en het ’n belangrike rol gespeel om die VF Plus met moderne staatkundige ontwikkelings rakende selfbeskikking en minderheidsregte in die wêreld te belyn.

Hy is die voorsitter van die party se grondwetlike en beleidskomitee en ook ’n lid van die uitvoerende dagbestuur.

Hy is die provinsiale leier van die VF Plus in die Wes-Kaap.

Hy is met Alma Visser getroud en hulle het twee seuns en twee dogters.