Litnet

Net soos koffie en beskuit het Coffee Snobs se gevoelvolle musiek ’n vertroude naam in Suid-Afrikaanse huishoudings geword. Aroma, die sangduo Marius en Vernette Wessels se debuutalbum, is in 2015 bekendgestel. Sedertdien sing hulle die land aan die brand met treffers soos "Eie land" en "Sê my".

2018 was 'n groot jaar met hul tweede album Lig wat einde Februarie die lig gesien het. Al die lirieke op Lig, in Afrikaans en Engels, is oorspronklike tekste uit Vernette se pen. Vernette onderskei haar deurgaans nie net as liriekskrywer nie, maar ook as komponis. Lig se sukses word bevestig deur die nominasie vir Huisgenoot se Tempo-toekenning vir beste kontemporêre album van die jaar. Dit sal ook die derde opeenvolgende jaar wees dat een van hul lirieke as die temalied vir die gewilde JoBerg2c-bergfietswedren gebruik word, hierdie jaar met “Wildest dreams” vanaf die nuwe album.

Coffee Snobs se musiek is vars, oorspronklik en treffend. Die lirieke se poëtiese kwaliteit en melodieë is uniek – hulle is ewe tuis in die styl van die klassieke ballade, die liriese ode én funky sosiale kommentaar en parodie. Coffee Snobs se musikale aanslag en sensuele intensiteit maak dat hulle ongetwyfeld een van die opwindendste musiekgroepe in Suid-Afrika is.