"As ons ophou praat" deur Whitey Bruinders

  • 0

Geskryf vir: Straatligkinders

Witgatspreeu, Woefkardoes, Weskusroes
rol ons woorde
soos trekkerwiele op gruis
deur ander tale se gesuis

Koor:
Geselstaal, Droomtaal, Singtaal
as ons ophou praat
sit ons in Tamatiestraat

Boggherol, Bloemenwil, Baaisiekel
styg ons klanke op
soos soet akkoorde
in oestyd oor vrugteboorde

Koor:
Dinktaal, Bedtaal, Skeltaal
as ons ophou praat
sit ons in tamatiestraat

Holrug ry, Aapstuipe kry, Lekker vry
eggo ons spreke
soos mistige newels
oor kranse en heuwels

Koor:
Juigtaal, Lagtaal, Prettaal
as ons ophou praat
sit ons in Tamatiestraat

Bobotie, Moskonfyt, Ouma se beskuit
kuier ons saam
om eeuoue resepte
van grootjie se beste

Koor:
Kerktaal, Skooltaal, Huistaal
as ons ophou praat
sit ons in Tamatiestraat

Kaaps, Pretoriôôns, Brakpanees
moet ons spulletjie weet
as ons ophou praat
gaan die taal in sy peetjie gaat

lyricMap homeMap


Teken in op LitNet se gratis weeklikse nuusbrief
. | Sign up for LitNet's free weekly newsletter.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top