Aan ’n jong swerwer
If you're traveling through the North Country Fair
while the winds hit heavy on the border line,
remember me to the one who lives there,
she once was a true love of mine.– Bob Dylan
Indien jy dalk ooit deur die droë Suidland ry
waar heuwels dofgeel in die horison wei,
en jy ’n jong swerwer langs die pad sou kry,
kyk mooi – hy was dalk ’n liefde van my.
As jy sou gaan as die somerson brand,
in die tyd wat die winter nog elders gaan draal,
kyk asseblief tussen duine en sand
of hy nie dalk nog eensaam daar dwaal.
Let dan tog op of hy praat van die see,
van die vlaktes en berge, en of hy dalk hou
van mense in statte, hul weidings met vee.
Want dít is wat ek van hom onthou.
En ek wonder of – wanneer die dag
hom dwing om te rus voor hy verder kan ry –
daar waar hy skemer se koelte inwag,
hy darem net vlugtig sou dink ook aan my.
So, sou jy dalk ooit deur die droë Suidland ry
waar heuwels dofgeel in die horison wei
en jy die jong swerwer langs die pad sou kry,
onthou hom: hy was eens ’n liefde van my.
 |
 |
 |