aan die oewers

  • 0

Foto: Canva.com

aan die oewers

daar was ’n tyd toe die bome vlam 
gevat het in die namiddag en die blare 
gebewe het met die wete 
dat die mooiste seisoen sy 
roes afwas

hy droom van tonge aan die oewers van die phlegethon 
hy droom dat hy my kan verbrand

daar was ’n tyd toe die aarde gestroop 
was van grillige versiering die sterre was skerper 
die naakte skelette van bome het 
’n skoonheid teen die gekraakte 
ys van die nag geëts

hy droom van dooie bome aan die oewer van die akheron 
hy droom dat hy spyt het oor die skade

daar het ’n tyd gekom toe die blomme kop 
uitsteek en nuwe kleure oopsprei teen die 
krakerige lug en die stuifmeeldrade het 
gebewe teen die aanslag van soveel 
nuwer sagter slimmer lewe

hy droom van ’n lyk in die waters van die kokytos 
hy droom dat hy in rou is

in daardie tyd van verswelging en benoudheid toe 
die strale deur alles gedring en geen donder en 
bliksem en blitzkrieg-reënval die verf 
uit die krake van die aarde kon was nie 
het die sonbesies geskreeu en geskreeu en geskreeu

hy droom van nat, gladde klippe aan die oewers van die styx 
hy droom dat ek hom haat

daar was ’n tyd van seisoene en skakerings 
van sterfte en groei toe blare 
oopgevou en opgevou en toegevou het en 
allerlei geure en geheime aan die grond 
en die krake in die lug gefluister het

hy droom van nimfe aan die oewers van die lethe 
hy droom dat hy my vergeet het

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top