Litnet

Ek lees vanoggend in die Beeld dat Bok Bryan vermy sy pa al drie jaar agv sy ouers in bitter egskeiding.

Elkeen van ons koester ’n vlinder. Dit is nou, binne in ons hart. Hierdie vlinder roep om vrystelling. Die weg na ’n gesonde selfbeeld word bepaal deur die sterkte van die vlinder se vlerkspan. Vlerke wat hoog kan opflapper, sweef makliker op die wind en word aangetrek deur die hitte van die son.

Daar is net een pad wat die vlinder van die mens tot volmaakte transformasie kan ontluik, en dit is die weg van selfaanvaarding en totale oorgawe aan Jesus Christus.

Waarom sou die Joodse kinders, die nag voordat hulle in die gaskamers gesterf het, vlinders in die mure van die houtbarakke uitgekerf het? Was daar ’n flikkering van hoop in hulle harte, dat die vlinder uit hul lewens vrygestel sou word. Deur die dood?

Hierdie stelling bevat ’n verborgenheid, van selfontplooiing tot Godsverheerliking, en dit weer deur ’n proses van selfverloëning. Selfs Paulus bely in Rom 7:18 “Ek weet dat die goeie nie in my woon nie, nie in my sondige aard nie.”

Selfverloëning breek deur tot selfverwesenliking en wanneer dit gebeur gaan dit nie om eie eer of ambisie meer nie, maar om Godsverheerliking.

As kind, is ek en jy uit ons lewensomstandighede gevorm, die produk van dit wat vandag uitgeleef word.

Dorothy Law Nolte het iewers die volgende woorde neergepen:

As ’n kind met kritiek saamleef
leer hy om te veroordeel...
As ’n kind met vyandigheid te kampe het
leer hy baklei...
As ’n kind met skande moet saamleef
leer hy skuldig voel...
As ’n kind aanmoediging ervaar
leer hy selfvertroue...
As ’n kind met aanvaarding en liefde omring word
leer hy om lief te hê ...
As ’n kind goedkeuring ervaar
leer hy van homself hou...

Hierdie dinge kan selfs in die sirkel van ’n huwelik opgemerk word. Dinge soos kritiek, verwyte, afbrekende woorde en veroordeling, vang die vlinder vas in die greep van die hand wat dit beheer en manipuleer.

Daarteenoor, sal ’n gesindheid en benadering van die huweliksmaat se liefde, waardering, teerheid, ondersteuning, lof en waardering mense bevry tot oorwinning en groter hoogtes in die son van hul huwelik.

Voorwaar blomtyd vir die vlinder, die gees van die mens.

Leef jou vlinder vry?

Trienie