Litnet

Beste Brand,

Weereens dankie vir jou betekenisvolle bydrae onder hoofde "Is 'n kameelperd werklik oranje, soos 'n lemoen?".

Ene "Dolf", dweep die volgende onderaan jou genoemde bydrae:  Brand, Die punt is die “gordyn” is toe nooit toe getrek nie – om die waarheid te sê, dit het middeldeur geskeur meer as 2,000 jaar gelede. Dit is die oë van God gegewe geloof wat die ware prentjie sien soos dit nog altyd was én altyd sal wees. Soveel só, dat dié gelowige, alles wat hierdie wêreld bied, kwytraak, bieg, probeer bewys, ens. aan die een Waarheid kan toets, die Waarheid van die Woord van God, wat nog nooit verander het nie. Dit is die siende blinde en horende dowe mens wat daaraan wil verander, byvoeg en/of verdraai om die prentjie te probeer verander in dít wat hy of sy graag wil hê dit moet wees ... Jy sien, Christus is gister en vandag dieselfde en tot in alle ewigheid. Sterkte. Dolf

(Die vetdruk in die aanhaling hierbo, is deur die uwe aangebring)

Brand, sedert die ontstaan van LitNet is menige belangstellende reeds deur infernale ware Christengelowiges soos "Dolf" geteister; teister, want respek vir hul medemens, of diens tot eer van God, is daar nooit van enige sprake in hul farisese twis vol selfverheffing nie.

Teëstellend en ter bemoediging vir jou en enige ander wat sou belangstel, deel ek die volgende: Want nou sien ons deur 'n spieël in 'n raaisel, maar eendag van aangesig tot aangesig. Nou ken ek ten dele, maar eendag sal ek ten volle ken, net soos ek ten volle geken is. 1 Korinte 13:12 

Ja, dit staan inderdaad in dieselfde Bybel wat sogenoemde ware gelowiges in eie reg as die Woord, God, verafgod.

Mag Jesus Christus onse God, die Woord, self die wonder van verlossing in 'n ieder se hart skilder.

Namaste!

Hindoe-, Moslem-, Joodse, Boeddhistiese en katolieke liefde,

Cornelius Henn