Litnet

Dagsê Thys

Ek het jou reaksie Donderdag gesien toe ek vroeër die dag die blad oopgemaak het.  Die aand toe ek wou reageer is dit egter weg maar ek kon darem die strekking onthou, die dat ek gesê het jy klink vir my warm onder die kraag.  Ek was nogal jammer jou brief was (en is nog steeds [Webvoet?]) weg; daar is nog 'n paar dinge waarop ek graag sou wou reageer.  Terloops, dit is hoekom ek verkies om briewe hier te plaas eerder as om die kommentaarhokkie onderaan 'n brief te gebruik; jy weet nooit of die persoon dit gaan lees as jy so 2 of 3 dae na plasing reageer nie (want daar is nie meer advies dat kommentaar gelewer is nie) en, soos met jou gebeur het, weet mens nie of dit gaan verdwyn nie.

Eventwil, is jy oukei swaer?  Op een plek vertel jy van jóú probleme met evolusie en op 'n ander plek sê jy my paragraaf oor parasiete is lagwekkend?  Dit mag so wees, maar dan moet jy darem sê hoekom.  Het jy 'n verklaring vir die feit dat 'n parasiet gashere betrek wat miljoene jare uitmekaar op die evolusietydlyn sit?  As jy wel het, kan ek nie verstaan dat die ontstaan van verskillende rasse vir jou 'n probleem is nie want in vergelyking met die ontstaan van parasiete is dit triviaal.

Laat ek vir jou 'n storie vertel, 'n gelykenis kan jy maar sê.  Ek het 'n kar gehad waarvan die spoedbeheermeganisme half bonatuurlik was.  Ek stel hom op so 142 km/h en hierdie spoed handhaaf hy van die Transvaal tot in die Kaap.  Dit was nie asof hy eers spoed verloor of wen wanneer ek 'n opdraande of afdraande teëkom nie; dis asof hy geweet het hier kom 'n op- of afdraande en dié betree hy dan met net die regte kragtoevoer om nie 'n krieseltjie spoed te verloor of te wen nie. 

As ek iemand wat homself as 'n kenner uitgee sou vra hoe dit werk kon hy my enigiets vertel; dit kon 'n klomp twak wees om óf van my ontslae te raak, óf om sy onkunde te verdoesel.  Ek en hy kon vir ure 'n debat daaroor voer en, wat ons ookal vir mekaar te sê sou hê, doen niks aan die motor se vermoë nie; hy kan nog steeds 'n konstante spoed handhaaf al het ek en die kenner nie die vaagste benul hoe dit werk nie.  Maar nie een van ons val die motor se vermoë aan nie; elkeen dink net dat die ander een se verduidelikings nie water hou nie.

Nou werk dit so:  As ek 'n gemis in die kenner se verduideliking sien, kan hy my op die fout in my redenasie wys of my reghelp deur bewyse voor te lê.  Wat hy NIE kan doen nie is om kwaad te word en/of my beskuldig dat ek nie meganika of hidroulika verstaan nie want dan systap hy die kwessie; erken, in effek, dat hy twak praat.  As hy 'n gemis in mý verduideliking sien kan hy wel sê hy vind dit belaglik en vertel hoekom.  Wat hy NIE kan doen nie is om kwaad te word en/of my beskuldig dat ek nie meganika of hidroulika verstaan nie want dan systap hy die kwessie, erken, in effek, dat hy self nie 'n idee het nie.  Jy volg die strekking, nè?

Jy lees ook nie eintlik met begrip nie.  Nêrens het ek gepraat van die halfpadmerk van fossiele nie.  Tot vervelens toe is al vertel dat die goed wel bestaan en of dit nou so is of nie is nie ter sake nie; ek het gevra wat is die halfpadmerk van 'n proses soos metamorfose, jy weet, eier – wurm – papie – mot – eier – wurm ens.  Jy skyn ook nie te begryp het wat ek met donker massa en donker energie probeer sê het nie, naamlik dat astrofisici, noem dit maar gedragspatrone, agtergekom het wat hulle nie met huidige fisika kan verklaar nie en nou noem hulle dit solank 'donker'.  Niks verkeerd daarmee nie; ek is vol vertroue dat hulle dit nog sal uitpluis.  Ek sê maar net daar is nog baie onbekende dinge.

Nog iets wat jy NIE kan doen nie, Thys, is om aan te neem dat jy mense tereggewys het, en dan nog die vermetelheid te hê dat jy jouself die luukse gun om ongeduldig te raak oor hulle nie na jou wil luister nie bid jou aan.  Dit kan jy slegs doen as jy die hele evolusieleer in pag het en dis iets wat nie eers Darwin of Dawkins op aanspraak kon / kan maak nie.

En nee, my regte naam is nie Herman nie en ek weet ook nie wat jy met 'DB' bedoel nie, 'Die Beeld'?  Indien wel, ek lees nie eintlik 'liberale' (in aanhalings want eintlik is die koerant maar saam-met-die-stroom, verkramp dus) koerante nie en kuier nie op sulke webwerwe nie.  Vir jou inligting, ook nie creationism.com of wat ookal nie.

Groetnis

Jan Rap