Wie is die skrywer van hierdie skrywe uit Rapport Tydskrif van 2010?

  • 0

Die briewe wat op SêNet verskyn, is die menings van die briefskrywers en nie noodwendig van die LitNet-redaksie nie.

In die Rapport Tydskrif (17 September 2010) het ’n onbekende skrywer ’n brief (na aanleiding van “Jy is my liefling en ek is so bly”) geskryf as geskenk vir Breyten Breytenbach se verjaardag. ’n Vriendin van my het so twee jaar gelede by Breyten probeer uitvind wie die skrywer van die pragtige stuk (die brief) is en dit was die eerste keer dat Breyten self die skrywe gesien het. Hyself het nie ’n idee gehad wie dit is nie. Ek sal baie graag wil weet wie die skrywer was?

Hieronder is Breyten se gedig waaroor die brief gehandel het:

"Jy is my liefling en ek is so bly"
(Breyten Breytenbach)

Uit: Lewendood, 1985

in die Rue Monsieur-le-Prince
met die afgaan aan die linkerkant
d.w.s die Luxembourgtuine se hand
waar die son saans die klein takkies brand
om snikheet in die bome nes te kan maak
en dié van die bruidskoek Odeonteater
wat ’n heuningnes van vryheid was
so lank gelede al in Mei agt-en-sestig

in die Rue Monsieur-le-Prince
is die restaurant waar ons presies
om nege-uur en nie ’n dag later
sal ontmoet
jy sal my herken want ek sal
wéér ’n baard besit
al is dit dan van goedkoop silwer
of ’n boom uitgebrande stokkies as
en die Algeryns baas-cum-kok
met die moestas in die nes van sy rooi wange
sal seker sy arm vol bye om my skouers kom lê
om te sê
alors, mon frère – ça fait bien longtemps …

sal ons couscous mouton bestel vir twee –
ek kan die gekorrelde sneeugeel graan
en die bietjie botter al proe -?
en ’n bottel baie donker Sidi Brahim
met die smaak van die son en die see
van die Maghreb se wingerde?

wat sê jy daarna van ’n thé à la menthe
gemeet in gloeiende glasies met blommetjies versier
en van daardie soetgoed
wat swaar en lig van heuning is?

hoor hoe roep dieselfde wind
deur Parys se ou-ou strate

jy is my liefling en ek is so bly

En hier is 'n uittreksel uit die brief - oor wie die onsekerheid bestaan wie die outeur was:

"’n Ode aan Breyten se Parys", Rapport Tydskrif 2010-09-17

Helaas, mnr. Breytenbach, jou Algerynse kok is lank nie meer naas die Odeon se skadu nie.

Sy plek is ingeneem deur Yves Camdeborde en sy Comptoir, waar selfs Parysenaars saam met toeriste ’n maand lank moet vooruitbespreek vir die befaamde kok se ouwêreldse aanslag. Maar moenie die effek van jou Pieds Noirs op die smaakknoppies van Frank-ryk onderskat nie, want vandag is couscous vir die Franse wat kerrie vir die Britte geword het.

Aah, Parys, Parys: as jy verlief geraak het in Parys, vertel ’n kennis my, bly jy verlief – lewenslank. En ek antwoord: maar wat as jy dan verlief geraak het óp Parys, en in die stilligheid wonder of jy jou vrou sou verlaat vir die giere van jou nuwe minnares?

Die Stad van Ligte weet mos fyntjies presies hoe om haar flikkers te gooi, of dit dan nou die felle somerslig is wat middag weerkaats van die Seine oor haar brûe, die bolwangige ronding van ’n volmaan bo die Jardin de Tuileries, of die slank pienk skadu’s waarin haar heilige hart, die Sacre Coeur, om ligdag soggens geklee is voor die miernes mensdom op haar toesak. Wat kan ek jou vertel oor jou stad van ’n veelvoud 16 Septembers, Breyten Breytenbach – ’n stad waarvan jy die tipografie waarskynlik so goed ken as jou eie Yolande se rugkartelinge? ..."

 

Groete, Johan de Kock

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top