Só skryf mens ’n limeriek

  • 1

Philip: "Ek verkies om van ’n limerick te praat in plaas van die Afrikaanse vervorming limeriek, maar volgens HAT is beide vorms anvaarbaar."

 

DIE LIMERICK

Die Geskiedenis van die limerick:

Limericke het omstreeks 1820 in Engeland begin en het veral populêr geword deur die Limericke van Edward Lear. Alhoewel daar in Ierland ’n dorp met hierdie naam is, het niemand ’n idee waarom hierdie versies so genoem word nie.

Hier is ’n Edward Lear-Limerick:

There was an old man with a beard

Who said: "It is just as I feared.

Two owls and a hen
Two larks and a wren

Have all made their nests in my beard."

Gedurende die 20ste eeu het die Limerick ál slimmer en stouter geword. Die Limerick is een van die mees toeganklike van alle versvorms en almal ken ten minste een wat hulle om die braaivleisvuur of in ’n kroeg gehoor het.

Die Limerick bestaan altyd uit 5 reëls en dít is hoe hy lyk: Die eerste, tweede en vyfde reëls is ewe lank. Reëls nommer 3 en 4 is korter en word effens weg van die kantlyn geskryf.

+++++++++++++++++
+++++++++++++++++

++++++++
++++++++

+++++++++++++++++

Die eerste reël is altyd oor ’n persoon óf die plek waarvan hy kom, byvoorbeeld:

Die lelike mevrou Van Zyl ... 
ʼn Dame genaamd Bernadette ...
ʼn Kêrel wat woon in Parys ...
ʼn Oupa van Somerset-Wes ...

Die lang reëls kry dieselfde rymwoord aan die einde en die kort reëls het ook elkeen hulle eie rymwoord. En tradisioneel begin elke nuwe reël met ʼn hoofletter.

ʼn Tannie woonagtig in Bloem
Was bang toe ʼn by om haar zoem.

Toe slaan sy hom plat
Dat heuning so spat

En spuit hom toe poegaai met Doom.

Die Limerick het ook ʼn spesiale ritme (metrum) en dít is baie, baie belangrik!

As jou metrum inkorrek is, kan jy net sowel daardie limerick weggooi.

Sê die TAM harder as die eerste ta en dan het jy ʼn idee hoe die ritme van ʼn basiese Limerick werk.

taTAM tataTAM tataTAM 
taTAM tataTAM tataTAM

taTAM tataTAM 
taTAM tataTAM 

taTAM tataTAM tataTAM

Lees nou die bogenoemde limerick weer ʼn keer en lees die vetgedrukte gedeeltes harder as die ander, en dan het jy die korrekte ritme vir die limerick.

As jy die limerick later lees, gaan jy natuurlik nie die klem op daardie lettergrepe laat val nie, maar jou ritme sal dan perfek wees.

ʼn TANnie woonAGtig in BLOEM
Was BANG toe ʼn BY om haar ZOEM.
Toe SLAAN sy hom PLAT
Dat HEUning so SPAT.
En SPUIT hom toe POEgaai met doom.

ʼn Limerick, al klink dit hoe eenvoudig, moet aan geskaaf word, al is dit vir weke lank totdat jy weet dat dit perfek is.

Ek hoop hierdie paar woorde help ʼn bietjie.

ʼn Uitstekende boek om te lees is The Art of the Limerick deur Cyril Bibby.

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top