Litnet

... dat jy my nog 'n paar antwoorde skuld – en die antwoorde wat jy wel gegee het hou nie eintlik water nie.

Die een kwessie is die van etiek-waentjie waarop almal nou spring; word as 'n kursusse by onderwysinstansies, of in groot firmas se slypskole, aangebied.  Hierdie kursusse spreek kwessies aan soos die wederregtelike vat van ander mense se goed, die mors van die firma se tyd, skade aan ander mense berokken en/of hulle ondergrawe, die soort van ding, presies wat vervat is in enige godsdiens. 

Uiteraard luister ek Donderdagaande na Islam in Fokus (dit is my aard om laat, onder andere LitNet, te lees en briewe te skryf terwyl die radio aan is).  Indien die mense wat hierdie godsdiens aanhang die beginsels wat daar verkondig word getrou navolg, is geen kursus in etiek nodig nie.  Netso wat die Christene betref; sou hulle die christelike norme en waardes aanhang het hulle ook nie etiekkursussies nodig nie en ek sou reken dieselfde geld vir die ander religieë ook.

Ek stem saam die aanhangers van Islam of Christendom (en seker die ander godsdienste ook) handel nie altyd soos van hulle verwag word deur hulle onderskeie religieë nie, maar dit negeer nie die etiese beginsels wat daar verkondig word nie.  Daar skyn definitief 'n omgekeerde korrelasie te wees tussen godsdiensbeoefening en etiekkursusse;  soos godsdiens kwyn, groei die noodsaaklikheid van etiekkursusse want mense het nie meer waardes nie.

Bogenoemde relaas van my is natuurlik sinneloos as jy ook teen etiekkursusse preek soos jy teen godsdiensonderrig preek.  Indien dit die geval is vra ek om verskoning en jy kan al voorafgaande ignoreer.

Ek het jou gevra of jy godsdiens per se kan beskuldig wanneer die instelling – byvoorbeeld van die  kerke en die betrokke gedagsdraers – hulle wangedra soos gebeur het met die Spaanse Inkwisisie.  Die stryd tussen die Katolieke en Protestante in Ierland word dikwels voorgehou as bewys dat godsdiens onmin veroorsaak.  Dit is vals; in die hele Europa, en selfs hier, leef Katolieke en Protestante in vrede langs mekaar. 

Aan die ander kant leef byvoorbeeld Hutu's en Tutsi's in onmin, ongeag watter godsdiens hulle aanhang.  Om die waarheid te sê, byna al die etniese groepe wat saamgeboender is een van die kunsmatige lande van Afrika het nie ooghare vir mekaar nie; kyk nou maar weer na die spesiale reëlings wat in Kenia getref word om sekere etniese groepe gedurende die verkiesing uitmekaar te hou.

Ek het ook gewonder of jy nie 'oopkop' met 'voor-op-die-wa' verwar nie na aanleiding van jou vergelyking tussen Afrikaanse en Engelse studente.  Ek het niks van jou gehoor in die verband nie en dus bly ek glo dis sommer net 'n wilde stelling.  Terloops, ek is seker jy beskou jouself as oopkop en ek is seker jy was op skool in die ou bedeling so, wanneer het die kentering by jou ingetree? 

Hier's nog 'n wilde stelling van jou George: 

My beswaar is dat wiskunde en wetenskap in Afrikaanse skole verdwerg word deur sinnelose tydvermorsery op dinge wat in die huis en kerk en moskee aangespreek behoort te word maar wat in klaskamers in alle vakke geskied. In plaas daarvan dat die kinders wiskunde- en wetenskaponderrig ontvang, word kinders van graad een af wys gemaak dat die gode wat hulle aanbid, inderdaad wetenskaplik bewese is.

Op watter skool was jy waar hulle huis-, kerk- en moskeedinge in die wiskunde- en wetenskapklasse bespreek het en dit nogal tot so 'n mate dat dit wiskunde en wetenskap 'verdwerg' het?  En in watter skool maak hulle van graad een af die kinders wys dat 'die gode wat hulle aanbid wetenskaplik bewese' is?  George, ek stel dit aan jou dat jy hier 'n wolhaarstorie verkoop.  Ek was in 7 (ja sewe) laerskole en in nie een van hulle, óf in die hoërskool, het ek so-iets ondervind nie.  Ek het ook nog nooit iemand teëgekom wat 'wetenskaplik' bewys dat die 'gode' wel bestaan nie, selfs nie onder die ergste biblepunchers en dwepers nie.

Nog 'n kwessie is jou bewering dat godsdiensonderrig leerlingprestasie striem.  Ek het gevra of die aankoms van die nuwe SA nie dalk 'n groter positiewe korrelasie met swak skoolprestasies het as wat godsdiensonderrig het nie, veral in die lig van die feit dat leerlinge in die ou bedeling uitstekend presteer het en dit terwyl godsdiensonderrig nog in volle swang was.  Jy het niks hierop gesê nie (behalwe aanbeveel dat ek boeke van jou gunstelingskrywers lees).

Ek beweer (eintlik stel ek dit kategories) dat wiskunde en wetenskap, alle vakke om die waarheid te sê, geweldig ly as gevolg van die nuwe bedeling.  Die ontwikkeling wat jy so graag wil sien, maar wat nou ontbreek, is nie as te wyte aan godsdiensonderrig nie maar as gevolg van hierdie bestel waarvoor jy, heel waarskynlik, jou beywer het. 

Beslis nie jou skuld dat jy meegedoen het aan wat nou 'n gemors is nie (jy sal mos nou nie doelbewus veroorsaak dat, onder andere, boere vermoor word en Afrikaans afgejak word nie of hoe?); jy was mislei deur die pers of jy het dalk, juis vanweë jou verbintenisse met die pers, inligting gehad wat nie vir elke Jan Rap en sy maat beskore was nie.  Wat ookal die geval was is geen rede om hierdie bestel goed te praat of te swyg oor sy vergrype nie.  Dit is nou tyd om die handskoene uit te trek waarmee napraters, apologete en agterryers behandel word.

Jou hele handskoenartikel is 'n kaartehuis George.  Die land brand en jy speel met kaarte.  Jy het 'n openbare platform en jy mors tyd met absolute en totale onbenullighede terwyl jy in elk geval vir die verkeerde bossie blaf.  Jy het 'n morele plig om die ongeregtighede wat teen die Afrikaner gepleeg word aan die kaak te stel.  Jy sal die handskoene moet uittrek waarmee jy die regering en die 'liberaal-demokratiese' Afrikaners behandel.

Groetnis

Jan Rap