Ek soek

  • 2

Julle het nie op my vorige boodskap gereageer nie en julle sal seker ook nie op hierdie een reageer nie. Riana Scheepers het in haar boek wat ’n mens vertel hoe om te skryf (het die titel vergeet – ek onthou nie titels en skrywers se name nie, maar ek onthou die inhoud van ’n boek nogal goed – miskien lees ek te veel). Kom ek begin oor. Riana Scheepers het voorgestel dat ’n aspirant-skrywer ’n koffie-afspraak met die uitgewer maak, sodat hulle mekaar kan leer ken en weet wat om van mekaar te verwag. Sowat ’n maand gelede bel ek toe die uitgewer van my keuse. Wat ’n teleurstelling.

“Vergeet dit,” sê sy toe ek haar vir koffie nooi. Kom nou, ek is te oud om voor bang te wees, verdomp.

“Ek dink jy moet begin deur ’n slypskool by te woon,” is haar raad toe ek haar vertel dat ek ’n roman geskryf het en ’n uitgewer soek. Ek het seker nie die regte geluide gemaak nie, toe kom sy agter ek is nie ’n taalkundige nie. Juis daarom soek ek iemand om my roman te lees en aan my terugvoer te gee, al is dit net om my te  vertel dat ek nie kan skryf nie. Bowendien het ek reeds ’n slypskool bygewoon en het ek al nege akademiese handboeke en meer as vierduisend akademiese artikels geskryf, ongelukkig in Engels. Ek woon tans nog ’n slypskool by. Wat ’n grap! Hoe kan iemand ’n slypskool aanbied as hy of sy nog nooit iets gepubliseer het nie en maande neem om terugvoer te gee op oefeninge?

Riana Scheepers (of dalk was dit iemand anders wat ’n bydrae in die boek gemaak het) skryf in haar befaamde boek dat uitgewers tot agtien maande neem om ’n boek te publiseer, nadat hulle ’n ooreenkoms met jou onderteken het. Geen wonder uitgewers kan nie oorleef nie. Verdomp, ek het al drie romans geskryf in die tyd wat ek na ’n uitgewer soek (sowat ses maande).

Riana Scheepers kla dat aspirant-skrywers van haar verwag om hulle pennevrugte te evalueer sonder om te betaal. Ek het aangebied om haar te betaal. Sy het my nie eers geantwoord nie en ek het twee e-posse gestuur. Geen wonder skrywers kan nie geld maak nie.

Nou, in geval iemand tot hier gelees het. Ek soek ’n uitgewer, maar eers iemand wat my boeke kan evalueer en aan my terugvoer gee. Die persoon wie my eerste roman tans evalueer, wie ek reeds betaal het en wie se besonderhede ek op LitNet gekry het, het nou nog nie aan my terugvoer gegee nie (na twee maande). En ek sal dit waardeer as iemand ’n behoorlike slypskool kan aanbeveel.

Hannes Nel

  • 2

Kommentaar

  • Hallo Hannes

    Ek het jou brief aandagtig gelees. Hier volg 'n voorstel: jy soek onder andere na  'n leser vir jou roman ; ek soek na 'n  leser vir my digbundel.

    'n Leser  met  kundigheid om konstruktief te kan kritiseer. Transaksie vir ruildiens? Ek soek nie betaling nie, slegs deeglike begrip van wat die bundel poog om te bereik en eerlike konstruktiewe kritiek. Ek is bereid om dieselfde te lewer.

    Ek woon in die Wes-Kaap. Afhangende van waar jy woon, kan ons gerus 'n koppie koffie (of selfs meer as een) saam geniet  iewers in die Wes-Kaap voor ons ooreenkom om manuskripte te ruil, want  "dan weet ons wat om van mekaar te verwag".

    Antwoord gerus per e-pos na onderstaande e-posadres. (Carlm is 'n skuilnaam. En ek is 'n lelike ou man, te oud om voor bang te wees.)

    carlm@telkomsa.net

    Naskrif: jammer, ek weet nie van slypskole wat aanbevelingswaardig is nie.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top