Litnet

Ronel Wiese voltooi ’n BEd-graad met spesialisering in vroeë kinderonderwys en grondslagfase aan die Universiteit van Pretoria en in 2012 ook ’n BEd Honneurs in leerderondersteuning, beroepsvoorligting en berading. In 2016 verwerf sy ’n MEd-graad in vroeë kinderonderwys, en die navorsingstudie behels ondersteuningstrategieë ter bevordering van gedragsbevoegdheid vir leerders met ATHV in die grondslagfaseklaskamer.

Ronel is tans ingeskryf as doktorale student aan die Universiteit van Pretoria onder leiding van Ina Joubert, Jan Nieuwenhuis en Melanie Moen. Haar navorsing gaan oor die leierskap van skoolhoofde in onafhanklike skole ter bevordering van ’n positiewe skoolklimaat.

Ronel is na werksure asook naweke as deeltydse personeellid aan die Universiteit van Pretoria verbonde. In die Groenkloofkampus se biblioteek en navorsingsruimte ondersteun sy meestersgraad- en doktorale studente met studieverwante hulp en inligting.

Ronel is ’n direkteur van die privaatskool Bronberg Akademie in Pretoria-Oos, wat sy nege jaar gelede gestig het en waar sy tans ’n organisatoriese funksie en bestuursrol vervul. Bronberg Akademie is geregistreer by die Gautengse Departement van Onderwys as ’n hoofstroomprivaatskool en maak voorsiening vir leerders met ATHV, leerders wat leeruitvallle toon en leerders wat sensoriese uitvalle of disleksie het. Die skool het tans 140 leerders en groei deur die Here se genade van krag tot krag.