Litnet

Johan van Graan was vir 16 jaar lid van die Suid-Afrikaanse Polisiediens (SAPD), waar hy in die Provinsiale Beskermingsdiens (BBP-eenheid) en die Misdaadintelligensie-eenheid gedien het, voordat hy hom tot die akademie gewend het. Hy het uit die polisiediens bedank met ’n versameling eervolle vermeldings vir sy betrokkenheid by die koverte ondersoek van verskeie nasionale en internasionale hoëprofielmisdade. Hy is tans professor in polisiëring en forensiese ondersoek in die Departement Polisiepraktyk, Skool vir Regspleging, Fakulteit Regsgeleerheid aan die Universiteit van Suid-Afrika. Sy navorsingsbelangstellings op die gebied van misdaadvermindering en -voorkoming en gemeenskaps- en intelligensiegedrewe polisiëring vind gestalte in sy toewyding aan die studie en navorsing van, asook onderrig in, hierdie dinamiese velde. As ’n ywerige navorser dra hy aktief tot sy beroep by deur professionele lidmaatskappe, die publikasie van vaktydskrifartikels, die skryf van boeke en hoofstukke in boeke, en die aanbied van referate by nasionale en internasionale konferensies en professionele forums. Johan het ’n doktorsgraad in polisiëring (Unisa), ’n meestersgraad in polisiëring (Unisa), ’n nagraadse B-Tech-graad in polisiëring (Technikon Suid-Afrika) en ’n nasionale diploma in polisiëring (Technikon Suid-Afrika). Hy is ’n redaksionele lid van die geakkrediteerde vaktydskrif Child Abuse Research: A South African Journal (CARSA), ’n nasionale raadslid en kriminologieverteenwoordiger van die Suid-Afrikaanse Professionele Vereniging vir Kindermishandeling (South African Professional Society on the Abuse of Children, SAPSAC), en ’n lid van die Kriminologiese Vereniging van Afrika (Criminological Society of Africa, CRIMSA).