Litnet

Dirk Postma is as professor verbonde aan die Opvoedkunde-kollege by Unisa, en werk in die Departement van Opvoedkundestudie (Educational Foundations). Hy onderrig teorieë en metodes van navorsing. Benewens die tradisionele fokus op kwantitatiewe en kwalitatiewe metodes gee hy spesifiek aandag aan die rol van konsepte en teorieë in navorsing, asook nuwere navorsingsbenaderings, soos inheemse metodes en postkwalitatiewe navorsing. Hy was voorheen verbonde aan die Universiteite van Johannesburg en die Witwatersrand waar hy verantwoordelik was vir die onderrig van filosofie van onderwys.

Hy het ’n MA  in filosofie aan die NWU behaal met ’n verhandeling in die wetenskapsfilosofie, en ’n MEd by Wits in kurrikulumstudie. Sy PhD by UP het aan die hand van Actor-Network Theory ’n kritiese perspektief op die tegnologie ontwikkel. Sy verdere navorsing vind plaas binne ’n kritiese posthumanistiese paradigma.

Postma was as hoofredakteur van Education as Change van 2013–2020 die dryfveer agter die oorgang na ’n kritiese, oop, aanlyn tydskrif.

Sy artikels en hoofstukke in boeke handel oor onderwerpe soos kritiese agentskap in die onderwys, regverdigheid in die hoër onderwys, ’n kritiese pedagogie van ruimtelike ordeninge in die onderwys, en die implikasies van kritiese posthumanisme vir die onderwys. ’n Goue draad wat deur die navorsing loop, is ’n belangstelling in die wording van die mens in verhouding met digitale tegnologieë binne ’n konteks waarin lewe op aarde al meer prekêr word.

Hy is ’n toegewyde tuinier en stapper.