Litnet

Albert Weideman is 'n professor in toegepaste taalstudie en senior navorsingsgenoot aan die Universiteit van die Vrystaat. Sy akademiese werk fokus op die assessering van taalbeheersing, spesifiek op die ontwerp en ontwikkeling van taaltoetse. Hy het in 1983 'n MA in linguistiek en toegepaste linguistiek (cum laude) behaal aan die Universiteit van Essex, en in 1987 die DLitt (UV) met 'n proefskrif getiteld “Applied linguistics as a discipline of design: A foundational study”. Hy is 'n gegradeerde navorser by die Nasionale Navorsingstigting, het meer as 50 artikels in geakkrediteerde tydskrifte gepubliseer, en is die skrywer van etlike boeke. Sy Beyond expression: A systematic study of the foundations of linguistics (2009) is baie positief deur resensente ontvang, asook A framework for the study of linguistics (2011). Hy het gedien in die bestuur van die Suider-Afrikaanse Vereniging vir Toegepaste Linguistiek, en dien tans in die redaksies van drie geakkrediteerde vaktydskrifte. Hy het al gaslesings aangebied by die Universiteite van Duitsburg, Leuven, Minnesota, Alberta, Maryland, Pittsburgh, Antwerpen, Tilburg, die Radboud Universiteit (Nijmegen), die National University of Singapore, Nanyang Technological University, en die Rijksuniversiteit Groningen. Sy bydraes oor verantwoordelike ontwerp bring taaltoetsing telkens in verband met die grondslae van sy vakgebied, die toegepaste taalkunde.