Litnet

Abraham Brits woon saam met sy vrou Renee, dogter Talita, Mitsie die hond en twee kapokhoenders op Fochville, ’n dorpie in Gauteng.

Soggens luister hy na die duiwe in die doringbome in sy agterplaas en saans kyk hy ver uit oor die Wes-Transvaalse randjies.

Na sy studies op die Puk in die tagtigerjare werk hy as joernalis vir die Herald, ’n plaaslike koerant in die Wes-Transvaal en word later subredakteur.

In die negentigs werf een van die rykste myne in die wêreld hom as hul mediabeampte en vir eers was sy skryfloopbaan op ys.

Die skryfdrang keer hom jare later weer in ’n hoek vas, toe hy en sy gesin vanuit Kanada na sy hartland terugkeer.

Nou skryf Abraham oor die wel en weë van gewone Suid-Afrikaners terwyl hy ook een van die grootste pandwinkels in die land bestuur.