Litnet

Hallo Varkspek

’n Geredekawel oor apartheid laat my altyd aan die gestry oor evolusie dink; daar is diepgaande besprekings sonder dat eintlik gedefinieer is presies waaroor gepraat word. Ek weet nou nog nie wat die bewoording van "Die Evolusieteorie" is nie (blykbaar is dit al ’n wet) net soos ek nie weet wat iemand presies bedoel as hy van ’apartheid’ praat nie.

As ’apartheid’ beteken die uitbuit en onderdrukking van mense op grond van velkleur en/of taal dan is dit ’n gruwel en moenie geduld word nie.  Dit is dan iets wat nooit beleid was van enige Afrikaneradministrasie nie maar wel beleid van die huidige bestel ten opsigte van Afrikaners spesifiek en in ’n groot mate ook ander Afrikaanssprekendes. 

Aan die ander kant, as ’apartheid’ beteken dat ’een ieder volk’ sy taal en land het is dit eintlik ’n natuurlike verskynsel soos jy kan sien aan die demokrasieë in res van die wêreld, veral Europa (Afrika natuurlik heeltemal uitgesonder).

Petty apartheid, stem ek saam met jou, was kwetsend en was nie noodsaaklik vir die destydse beleid nie.  Dit was in elk geval iets wat oorgehou was van Britse administrasie en sou uitfaseer word soos meer state onafhanklikheid gekry het.  Wie weet, dit was dalk die belangrike afkondiging wat Verwoerd sou maak die dag van sy dood. 

Terloops, die Engelse het nie net teen ras diskrimineer nie maar ook teen alles en almal wat nie-Anglo was.  Daar was byvoorbeeld nie Afrikaners in hulle Johannesburg Club (ek dink dit was die naam) toegelaat nie; nie dat enige Boer wat sy sout werd was ooit daar sou wou ingaan nie maar dis soos hulle werk, ’eksklusief’ is die wagwoord.

Waar die destydse Afrikanerregering wel ’n groot fout gemaak het was om die Bruines van die kiesersrol te skrap.  Dit was onnosel; die swartes was ’versorg’ kan jy maar sê want elke volk sou sy onafhanklikheid kry maar dit het die Bruines vervreem omdat hulle half in ’n vakuum gelaat was.  Bruin het dus nie eintlik ’n ander opsie gehad as om by Swart aan te sluit in ’n ’vryheidstryd’ nie. Teenswoordig, in hierdie sogenaamde demokrasie, kry die Bruines ’n koue skouer van die bewindhebbers; g’n wonder hulle voel bitter nie.  Ek sit ’vryheidstryd’ in hakies want die meeste swart volke was reeds vry.

Maar om terug te kom tot ’apartheid’, aparte parallelle ontwikkeling soos dit in Verwoerd se tyd bekend gestaan het, met ander woorde die skep van outonome demokrasieë vir elke kultuurgroep (soos byvoorbeeld Duitsland, Lesotho, Portugal, Swaziland, Denemarke, die soort van storie). 

Wat is jou beswaar hierteen?  Die feit dat volgens jou daar ’... geen heenkome...’ in die tuislande was nie?  Kan tog nie ’n rede wees nie want watter heenkome was daar gewees in die pre-koloniale tuislande, met ander woorde voor dit wit- en swartman mekaar raakgeloop het?  Jy wil tog nie beweer hulle kan nie vir hulself sorg nie; wat was dan die doel van die ’vryheidstryd’?

En wat is die alternatief vir die herstel van kultuurgrense (hoofsaaklik pre-koloniale grense)?  Dit is wat ons nou beleef; die saamgooi van 11 verskillende volke in ’n land met ’n kunsmatige,  –  en dus ’n onnatuurlike – grens.  En lyk dit vir jou of dit werk?  Kyk na die stadsrade wat ophou funksioneer het, die skoolsisteem wat omtrent ineengestort het, volksgesondheid en hospitale wat moer toe is.  Dink aan Selebi, Cele, Mdluli – en dis net die oortjies van die seekoei.

Hoe slegter dit gaan, hoe meer word geweeklaag oor ’apartheid’, die rooi haring wat die aandag van die huidige gemors moet aflei.  En hoe meer daar geweeklaag word, hoe meer word daar klere geskeur en askies gevra deur die kerke en voete gewas wat die idee versterk dat ons in die skuld is.  As ’n groep dra die Afrikaner aansienlik tot die staatskas by maar sy universiteite word weggeneem, so ook sy skole en kolleges, sy kinders word ten spyte van uitstekende prestasies beurse geweier en selfs sy taal word geminag; dorps- en straatname word ’getransformeer’, hy kan nie meer sy eie taal in publieke instansies praat nie, selfs nie eers die belastingkantoor waar hulle sy geld vat om die soustrein te voer nie.

Wat is die Afrikaner se reaksie op hierdie toedrag van sake?  Hy sê jammer, en doen boete en was voete om net die wraakveldtog verder te versterk.  Laat ek dit nou kategories aan jou stel Varkspek:  Jy of jou pa of oupa of oumagrootjie of kind of kleinkind het NIKS gedoen in vergelyking met die Engelsman, Kanadees, Xhosa, Duitser of Zoeloe, touens ENIGE nasie (behalwe miskien die Khoi- en Sanmense en Bruines) om jammer voor te sê nie. 

’n Laaste woordjie; as hierdie Anglo-Amerikaanse kolonie ’n demokrasie is, is my pankreas ’n pôpô.  Waar het jy gesien in ’n demokrasie, ’regering vir die volk deur die volk’, praat die staatshoof ’n vreemde taal met sy mense?

Groetnis

Jan Rap