Litnet

Dagsê Thomas

Jy wil om die verkeerde redes jou definisie van Afrikaner verander.  Jy was verblind en gebreinspoel maar nou dat jy bekeer is (in 'n politieke sin) wil jy die bruinmense ook as Afrikaners definieer, selfs al weet jy hulle wil dit nie hê, glad nie hê nie.  Die feit dat jy volhard hiermee dui op 'n skuldige, neerbuigende aksie van jou kant af wat dit nog erger vir enige trotse bruine sal maak.  Dit is 'n neerbuigende houding gedryf deur jou skuldgevoel, nie logika nie.

Ek sê weer vir jou, as enige mens, of hy nou bruin, geel of swart van kleur is na homself as 'n Afrikaner verwys dan is hy een – hy sal dan logieserwys doen wat Afrikaners doen soos sy uiterste misnoeë uitspreek oor die plaasmoorde, die verdwyning van Afrikaanse skole en plekname, die soort van ding.  Hy sal sy kinders in Afrikaanse skole sit, na 'n Afrikaanse kerk toe gaan en vies wees as spyskaarte en instruksies op blikkies en bottels nie in Afrikaans is nie.

Daar is dus nie eers sprake van 'n definisie nie.  As 'n Afrikaner sal hy, soos 'n Duitser of 'n Armeniër respektiewelik Duitse en Armeense belange op die hart dra en probeer bevorder, Afrikanerbelange op die hart dra en bevorder.

Buitendien, die oomblik wat jy praat van 'inklusief' beteken jy wil 'iets anders' insluit anders het die begrip mos nie sin nie, of hoe?  'Inklusief' in hierdie sin beteken dus dan, dat, in wese, volgens jou, iets anders as die Afrikaner nog moet bykom en wat dit ookal is, is dit nie Afrikaners nie.

Ek vind dit, om verskeie redes, verbysterend dat jy sê 27 April 1994 het jou vrygemaak.  Dit is juis vanaf daardie datum dat die heksejag op Afrikaans begin het, eers subtiel en nou openlik.  En nie net op Afrikaans nie maar ook op die Afrikaner; ons mense word met eentonige reëlmaat op die wreedste maniere op plase vermoor en dit haal skaars die nuus.

Nog 'n rede is die skielikheid van jou bekering, 'n soort van 'n Damaskusondervinding lyk dit my.  Uit jou politieke CV kom ek agter jy is nie enige Jan Rap en sy maat nie, jy het leiersposisies beklee.  Wil jy nou vir my sê jy (en jou ouers en grootouers en groot-grootouers) was mislei en gebreinspoel, al die jare en jare?  Kan tog nie wees nie.

Wat meer waarskynlik is, is dat die eintlike breinspoeling deur die pers, kerke en politici kulmineer het in jou 'bekering' op 27 April 1994.  Jy kan nou wel aanvoer dat dieselfde redenasie kan geld as wat ek hierbo gebruik het, naamlik dat jy as intelligente persoon ook dan nie nou gebreinspoel is nie.  Dit werk egter nou bietjie anders; die euforie is nou verby en om uit die kas van ontkenning te klim is moeilik.  Al hoe meer sluk die bitter pil en doen dit, ander sal eerder tien dode sterf.

Om af te sluit:  Die inklusiewe term wat jy soek vir almal wat Afrikaans praat is reeds daar, naamlik Afrikaanssprekendes.  Nie almal van hulle is Afrikaners nie, net soos alle Engelssprekers nie Engelse is nie.  Almal weet, die bruines ook, dat hulle 'n eksklusiewe groep is.  Anders, hoe sal regstellende aksie toegepas word?

Groetnis

Jan Rap