Litnet

Dagsê Jaco

Ek antwoord op jou kommentaar (versoek) onderaan my brief van 13 deser.

Ek sien jy hou aan dieselfde ding vra (en waarop ek elke keer geantwoord het, kyk maar in die argief) naamlik jy wil weet wat Dan Roodt DOEN, so al asof ek eendag in die verlede op ‘n seepkissie geklim het en gepreek het dat almal vir Dan moet volg (alhoewel dit nie ‘n slegte idee sal wees nie, die nou dat almal hom moet volg).

Die waarheid is dat jy, omtrent elke keer as ek my waardering uitspreek vir mense soos Dan Roodt, wat vreesloos die waansin van meelopery uitwys en dis maar onder andere, die papparellakoors kry en ad hominis (nog nie in die woordeboek nie) teenoor Dan raak. En elke keer as ek jou vra waarom jy so tekere gaan dan swaai jy die storie om, dan wil jy by my weet wat Dan Roodt nou eintlik doen. Jy wil nou’n lys, ‘n lange nogal, by my hê van wat Dan doen sonder dat jy ooit geantwoord het op wat hy doen om jou so verkeerd op te vryf.

Sien jy die sirkelargument? Jy’s die moer in oor wat Dan Roodt doen maar jy wil by my weet wat hy doen. Hoe werk jou kop?

Dan is nie die enigste vir wie ek in die bresse getree het nie; daar is ander waar ek ook probeer wys het dat hulle onregverdiglik verguis word soos onder andere Steve Hofmeyr, Sunette Bridges, Annelie Botha, Jacob Zuma en, kan ek vaagweg onthou, gays. Hoekom vra jy nie ook lyste van wat hulle doen nie?

Jy wil ook weet hoekom ek nie Afriforum loof en prys nie. Wel, dis maklik, niemand hier het nog Afriforum beswadder nie. Deon Maas (ook ‘n meeloper en agteryer par excellence) het eenkeer in ‘n onderhoud met ‘n verteenwoordiger van Afriforum taamlik snedig geraak, wou onder andere weet waar’s Zoeloeforum of so iets. Dit was oor die radio so ek kon nie direk reageer nie maar, as dit hier op SêNet was, kan jy seker wees ek sou hom ‘n paar vrae gevra het. Terloops, ek loof en prys ook nie vir Moeder Theresa, of Franciskus van Assisi nie. Dit beteken nie dat ek teen hulle is nie, inteendeel, ek hou baie van Moeder Theresa en Sint Franciskus.

Verder, oor Afriforum: Ek het al voorheen vir jou gesê as iemand iets vir Afrikaans doen is ek bly. Hoekom is wat Dan doen en Afriforum doen vir jou onderling uitsluitend, óf die een óf die ander? Ek moet egter sê, daar was ‘n geleentheid waar Afriforum geluide gemaak het waarvan ek nie eintlik gehou het nie, kan nie eintlik onthou of dit ten opsigte van Dan was, of Steve se singery van die stem nie.

Ten slotte, so met die teruggaan na die ouer briewe om nou te sien hoekom jy my beskuldig dat ek jou versoek ignoreer het, kom ek agter jy’s ‘n ontduiker, ‘n kop-in-die-sander, by uitstek. Byvoorbeeld, jy’t gesê ek beskuldig jou dat jy Vrye Weekblad ondersteun en ek het jou gewys ek het nooit so ’n beskuldiging gemaak nie. Jy’t toe nooit gesê jy’s jammer jy’t die kat aan die gat beetgehad nie. Jy’t beweer ek sê jy ondersteun Gilomee en ek het jou daarop gewys dat ek nooit so iets gesê het nie. Hierop het jy ook geswyg soos die graf; nooit gesê jy’s jammer jy’t die kat aan die gat beetgehad nie. Daar’s nog so een of twee maar ek het vergeet, nie lus om nou weer te gaan soek nie.

Ten slot der slotte: Ek gaan jou nou nie weer vra hoekom jy Dan so verpes nie want a) jy kan dit nie antwoord nie en b) ek weet in elk geval hoekom. Dan maak golfies en vir meelopers, agterryers en joiners is dit pynlik; dit stel hulle in die verleentheid by die base, dis nie PK nie en die base moet hulle tog ‘seblief nie as ongedienstig sien nie. Wat ‘n four king skande verskoon die Engels.

Groetnis
Jan Rap