Metamorfoses

  • 0

vry na Ovidius

 

'n Vis het sy skubbe

en is daardeur vis

maar 'n postmodernis

vul al sy hiate

met vermomde sitate

en reken hy is

die uiteindelike vis.

 

'n Parodis paradeer

met ander se klere:

'n vaalvalk wat smous

met loerie se vere.

 

Rare avis

plagiaris

die postmodernis.

 

Ironies, op die koop toe

die postmodernis:

op die keper beskou

'n aartskonformis;

plunder ander se oeuvres

van Barthes tot Vasalis

op jag na kapok

vir sy eie nis

(versteek met collages

die feit dat hy kaal is).

 

“Wat bly duur,”

profeteer

die beroepsmodernis,

“is mý Literatuur:

ek vis uit die waat’re

die kolos Moby Dick;

ek skaak alle roofvoëls

uit die Hoogromantiek.

 

"Ek is 'n menigte

ek bevat miljoene.

Weerspreek ek myself?

Verdomp, dis my reg!

Ek wat die Woord

en visioene besleg.”

 

Só babbel Zarathustra

in waanwysheid voort

verskans op sy krans

agter rieme papier.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top