Litnet

Sedert Copernicus en Galileo het die Bybel al sy geloofwaardigheid begin verloor, maar Darwin se evolusieteorie het dit drasties laat ineentuimel.

Dit is egter nie net as gevolg van die wetenskap dat hierdie ineenstorting plaasvind nie; vanuit alle oorde, ook vanuit kerklike geledere word die inhoud daarvan bevraagteken. Kort-kort lees ’n mens in die nuus van hierdie of daardie dominee wat die goddelike inspirasie, of maagdelike geboorte, of wonderwerke bevraagteken. In ’n onlangse publikasie HIER STAAN EK... ISBN 978-1-920424-23-7 onder redaksie van Diek van Wyk, Coenie Nolte en Leon Atterbury, vertel ’n aantal predikante van hulle ontnugtering toe hulle die Bybel eers regtig begin bestudeer het.

’n Figuur in die Suid-Afrikaanse geskiedenis, Anglikaanse biskop J W Colenso, http://www.britannica.com/EBchecked/topic/125226/John-Colenso , na wie die Natalse dorpie, Colenso, vernoem is, is veral bekend vir sy hewige kritiek op die Bybel in sy werk Pentateuch.

Biskop Colenso het met sy aankoms in Natal onmiddellik begin Zulu leer, en was verantwoordelik vir die vertaling van die ZuluBybel. Sy oë het oopgegaan toe hy studente by die sendingskool se ongemaklike vrae oor die Bybel moes beantwoord. Daar word vertel dat die Zulu-man wat hom gehelp het met die vertaling, party dae sommer gelê het soos hy lag vir die snaaksighede van die witmense se heilige boek. Wat Colenso o.a. gegrief het, was dat hy as biskop kerkwetlik verbind was om in die storie van Noag te glo.

In sy werk die Pentateuch wys hy daarop dat daar twee uiteenlopende skeppingsverhale in die Bybel is, dus twee verskillende vertellers en daarom kan dit nie deur God geïnspireerd wees nie.

In Gen. 1:9 kom die aarde uit die waters te voorskyn en is dus sopnat, terwyl in Gen2:6 kom die water uit die aarde uit om dit nat te maak.

In die eerste verhaal word die voëls en diere voor die mens gemaak, en in die tweede word die mens voor die voëls en die diere gemaak.

In die eerste word al die voëls wat vlieg uit die water gemaak en in die tweede word hulle uit die grond gemaak.

In die eerste word die mens volgens die beeld van God geskape, en in die tweede word hy uit stof en gemaak en asem ingeblaas. Dis eers nadat hy van die vrug geëet het dat God kon sê: “Die mens het nou soos een van Ons geword.”

In die eerste is man en vrou saam geskape en in die tweede is Adam van stof gemaak en eers daarna is Eva van sy ribbebeen gemaak. (Ek kan my net voorstel hoe die Zulu-man geskater het van die lag.)

Daar is nog hope ander verskille en Biskop Colenso gebruik dit om aan te toon dat die skeppingsverhaal afkomstig is van ander, ouer legendes van ander volkere, o.a. van die oud-Persiese heilige skrif, die Zend-Avesta. Hierin het die god Ahuramazdâ (Ormuzd) die heelal in ses periodes gemaak; eers die hemel, dan die waters, die aarde, die bome en plante, die diere en dan die mens, in daardie volgorde. Ormuzd het man en vrou gelyktydig geskape, maar hulle was soos Siamese tweeling aan mekaar vas en hy moes hulle van mekaar lossny.(Die ribbebeenstorie is darem een ding waarmee die Bybel oorspronklik is. Maar ’n mens moenie te gou praat nie.)

Biskop Colenso is deur die kerk as ketter verklaar en vir ’n tyd lank geëkskommunikeer.

Hoe gouer die Christen besef dat die Bybel nie letterlik nie, maar metafories gelees moet word, hoe beter is dit vir hulle. Dan het die Bybel nog ware betekenis. Maar hulle wil nie hoor nie en lewer hulle heilige boek uit aan die wetenskaplikes, die geskiedkundiges, die evolusioniste, die ateïste, die letterkundiges, en filosowe.

En dit voorspel net een ding vir die Bybel: toiletpapier! Binnekort sal daar “Red die Bybel”-optogte gehou moet word.

Groete
Angus