KKNK-persverklaring: ReWOLusie

  • 0

Honderde hekelaars van regoor Suid-Afrika en selfs in die buiteland het die afgelope 13 weke komberse as deel van vanjaar se uitbreiding van ReWOLusie geskep. Sewe van dié pragstukke word op Sondag 5 September op die Klein Karoo Nasionale Kunstefees (KKNK) se Facebook-blad opgeveil. 

“Ons het vanjaar se landswye hekel-saam-inisiatief in April bekendgestel. Een patroon van die bloudruk hekel-saam-kombers, ontwerp deur Oudtshoorniet Bets Wilkinson, is weekliks oor 13 weke beskikbaar gemaak. Meer as 1 500 belangstellendes uit Suider-Afrika en tot so vêr as Kanada, het geregistreer om deel te neem,” vertel Madeleine Miles, die meesterbrein agter ReWOLusie.

Alle fondse wat uit die aanlyn veiling ingesamel word, word gebruik vir vrouebemagtigingsprojekte deur hekel en brei, o.a. om Oudtshoorn-vroue in staat te stel om hul produkte op die KKNK se e-handelplatform en by ander geleenthede te verkoop. 

Miles vertel verder dat ReWOLusie ’n vennoot van filantroop Carolyn Steyn se veldtog 67 Blankets for Madiba is. “Deelnemers uit Oudtshoorn hekel en brei komberse wat uitgedeel word aan behoeftige persone as deel van dié projek. En die komberse is beeldskoon, sommige ontvangers kan nou spog met ’n hekel-saam-kombers.”

Wilkinson sê dit was ’n voorreg om by ReWOLusie betrokke te wees, maar erken ook dat die opstel van die meesterpatroon ’n uitdaging was. “Om met net  ’n paar bolletjies hekelgare en ’n hekelpen ’n kombers te begin hekel met geen patroon en slegs ’n paar idees in my kop, was uitdagend. Danksy Madeleine se ondersteuning, motivering en insette het die kombers vorm aangeneem en is dit voltooi,” vertel sy.

“Hoewel ek soms meer steke moes lostrek as wat ek gevorder het, was dit lekker om kreatief te wees en met patrone en kleure te speel. Groot was my verbasing oor die positiewe verskil wat dié kombers in mense se lewens gemaak het,” sê sy.

Hannelie Rix vertel sy het met groot afwagting uitgesien na Maandae. “Dit was vir 13 weke my hoogtepunt wanneer die patroon vrygestel word. Maandae was nie meer blou nie, maar gevul met die lieflikste lente kleure van my kombers. Wat ’n voorreg om hierin te kon deel met mede-hekelaars.”

Justine Cordier sê die kombers het haar herinner dat dit piekfyn is om uit te staan en gewaagd te wees. “Maar nóg meer belangrik, was dit ook wonderlik om in ’n tyd van donkerte en hartseer aan ’n projek te werk wat kleur en geluk in die lewens van baie mense bring.”

Heléne Lourens voel dieselfde. “Terwyl ek die kombers gehekel het, het ek gehoop en geglo dit gaan iewers vir iemand vreugde verskaf. As jy onder ’n gehekelde kombers toegegooi is, is jy met liefde toegegooi.”

“Ons leef in ’n tyd van onvoorspelbaarheid en soms moet ons net herinner word om die eenvoudige skoonheid in die wêreld rondom ons te waardeer. Hierdie kombers is daardie herinnering,” sê Janine Kotze.

Deleze van der Walt sê ReWOLusie was vir haar ’n kombinasie van harde werk en speel. “Ek is deurlopend daaraan herinner dat die samelewing uit mense bestaan wat so baie van mekaar verskil – soos die verskillende patrone in die kombers – maar ook hoe elkeen sy rol speel om ’n interessante, unieke geheelbeeld te skep. Daar is soveel skoonheid in kontras, kom ons waardeer dit ook van mekaar.”

Maritha Deenik, wat die patroon vooraf help toets het, sê die saamwerk agter-die-skerms en geheimhou van die patroon voor elke Maandag se vrystelling, was vir haar baie lekker. “Die saam-hekel het soveel liefde vir die span gebring. Hekel hou my brein te besig om depressiewe gedagtes toe te laat. Ingewikkelde patrone, interessante wolkleure en teksture word uitdagings vir my gedagtes en kreatiwiteit ontwikkel eerder as verveeldheid.”

Diegene wat steeds hul hand en hekelnaalde met die meester-patroon wil waag, kan dit tot die einde van September op die KKNK se webblad kry, waarna dit plek maak vir nuwe idees.

ReWOLusie is tydens die tiende kykNET Fiëstas in 2020 met ’n spesiale prys vir innovasie bekroon. Dié projek het nie net in 2020 ondanks die grendeltydperk die dorp verfraai nie, maar ook nagenoeg 1 500 komberse in die winter aan behoeftiges uitgedeel.

Die projek is ondersteun deur Absa met geskenkte wol, om hekelaars wat nie self wol kan koop nie in staat te stel om saam te hekel. Die komberse wat uit geskenkte wol gehekel word, sal aan behoeftige persone uitgedeel word deur middel van die 67 Blankets for Madiba-veldtog.

Hou die KKNK se Facebook-blad (https://www.facebook.com/KKNKfees) dop vir meer inligting oor die aanlyn veiling, of besoek www.kknk.co.za.

Vind aangeheg ’n foto van elk van die sewe komberse. Fotograaf: Ilse Jordan.

Al sewe is met katoenjaarn gehekel en die kombersgroottes is soos volg:

Hannelie Rix se kombers (pienk met blou, geel en groen) – 127 cm x 168 cm

Justine Cordier se kombers (pienk met rooi en blou) – 128 cm x 188 cm

Janine Kotze se kombers (ongebleikte katoen) – 134 cm x 195 cm

Deleze van der Walt se kombers (donkerblou, ligblou en grys) – 120 cm x 170cm

Heléne Lourens se kombers (ligblou en grys) – 124 cm x 180 cm

Bets Wilkinson se kombers (oorspronklike bloudruk vir hekel-saam 2021) – 126 cm x 183 cm

Maritha Deenik se kombers (groen-blou skakerings met grys) – 123 cm x 176 cm

 

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top