Die papawer val deurmekaar
raak ’n uitmekaar papawer
sowaar
- In die maer strate van Heideveld
op ’n middag só gewoon, lê Ma-Davids
in die kamer ’n wyle en rus
terwyl buite haar dogters traag hul bal
heen-en-weer speel
deur ’n skewe ring. Klink klappers meteens
hoek om in Waterbergstraat
En die papawer val uitmekaar
raak ’n deurmekaar papawer
sowaar
- In die droë strate van Heideveld
op ’n middag so terloops, hardloop
drie susters na hul maats
tromp-op, die spervuur waar gangsters
grootmeneer speel
met Breeze en Thupak reeds dood.
Koes agter mure in, maar te laat,
te laat
Nou lê Anthonia ook in die straat
terwyl ’n papawer groei op haar rug —
Nooit weer sal sy weet hoe droog
die spel
hoe veldvry die heide sterf
in Waterbergstraat