Laurinda Hofmeyr is deur die Cape Town Music Academy genader om gedigte van Suid-Afrikaanse digters sowel as digters uit Franssprekende Afrika-lande te toonset. Die uitkoms was Afrika my verlange / Afrique mon désir, 'n multimedia-wêreldmusiekproduksie met David Kramer as regisseur, en met musikante Laurinda Hofmeyr, Schalk Joubert en die Afrique mon désir Ensemble. Die produksie word afgerond deur animasie deur Diek Grobler.
Die produksie sluit Afrikaanse gedigte van onder meer Breyten Breytenbach, Antjie Krog, Sheila Cussons en Eugéne Marais in, terwyl Franse digters soos JJ Rabearivelo, Patrice Nganang, Ousmane Moussa Diagana en Véronique Tadjo se werk getoonset is. Dit ondersoek temas soos identiteit, verplasing en verlange wat deur mense uit Afrika gedeel word.
Afrika my verlange | Afrique mon désir is nog Sondag 11 Maart om 16:00 in die Stellenbosch-stadsaal te sien. Daar is ook 'n CD beskikbaar.