US Woordfees 2016: Een Maal was daar ... Johnny Hamman

Johnny Hamman (foto: http://nothambutman.com/)

Skrywers oor hulle nuwe boeke: Johnny Hamman oor Een Maal

Hallo Johnny, eenmaal was daar ... Vertel asseblief vir ons lesers wie is Johnny Hamman?

Johnny Hamman is sedert 2002 'n professionele sjef en is ook 'n huweliksbeplanner.

Johnny het in Limpopo grootgeword, in Stellenbosch by die Instituut vir Kulinêre Kunste studeer en daarna in Magaliesberg by die Mount Grace Hotel gewerk. Daarna het hy in Franschhoek gewerk, en in Namibië, weer in Stellenbosch en later ook in die VSA.

Vandag is Johnny aan die hoof van Slippery Spoon, 'n opwip- en onkonvensionele restaurant wat van elke onthaalgeleentheid iets unieks maak.

eenmaal_boekomslagWatter maal is jou gunsteling: ontbyt, middagete of aandete?

Vir seker aandete, maar dit moet lekker laat geëet word ons moet eers bietjie kuier.

Watter maal was die een wat jy geëet of voorberei het en toe dink jy: hmmm, ek wil ‘n sjef word!

Dit het nou nie so gewerk nie. Ek het vir twee jaar gekook op hoërskool en eers toe besluit dit is actually iets wat ek geniet en toe wou ek nog steeds eerder drama gaan swot het. Ek was sterk op pad om drama te swot toe ek besef het ek maak ‘n fout en toe verander my visie en toe gaan swot ek by die ICA in Stellenbosch.

Waar lê vir jou die klem in jou kookboek of as jy na ‘n maaltyd kyk – wat is vir jou die belangrikste van die dis?

Alles wat jy kook en vir mense voorsit moet ‘n storie vertel! Jy het een maal ‘n kans om iemand se hart te steel met ‘n dis!

Wat het jou laat besluit om deel te neem aan Kokkedoor?

Ek het by die werk ingestap die dag, toe lê die inskrywingsvorms op my lessenaar wat vriende daar geplaas het. Ek het so gekyk daarna en toe gedink why the hell not!

Wat was die snaaksste oomblik op die stel? En die mees spannende?

Die snaaksste was toe Renette se voorskoot aan die brand geslaan het. En die ergste oomblik vir my was toe ek besef dit is rook wat uit die stoompot uit kom, nie stoom nie.

Mens kom nie met almal oor die weg nie. Met wie het jy die beste oor die weg gekom wat saam met jou kos gemaak het?

Ek het nogals met almal oor die weg gekom. Ek het baie van elkeen van my spanmaats gehou! Veral Elsa, Marius en Renette.

Watter impak of nadraai het kykNET se Kokkedoor-program op jou lewe gehad?

Heelwat! Alles het verander. Maar die meeste is dat Kokkedoor my weer gehelp het om verlief te raak op kos en my die moed gegee het om my eie besigheid te begin.

Wat kan lesers verwag van jou resepteboek Een Maal?

Al hou jy nie van kook nie, is die boek visueel pragtig. Dit is so bietjie tongue-in-cheek en alles vertel ‘n storie. Dit gaan nie net oor kos en kook nie, maar alles wat kos en kook na ons lewens bring.

Johnny Hamman is by die US Woordfees 2016, bespreek by Computicket.

Kosdemo: Johnny Hamman (Kokkedoor-wenner)

Johnny beskryf homself as ‘n kreatiewe karakter met 'n groot passie vir paarties. Hy trakteer die gehoor met geregte uit sy splinternuwe resepteboek, Een Maal. Sien jou daar – met jou partytjieskoene aan. Donderdag 10 Maart 2016, 9 vm.

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top