Pretoria

  • 0

Pretoria

Ek wil vir jou
’n jakarandaboom pluk –
vir studentedae
vol bloeisels geluk

en Railways Café-palette
in jou agterplaas plak
met Indië-musiek in ons ore
en feetjielig in boom en tak

en ’n kar-serenade
in laatmiddagverkeer
terwyl ons die wittebroodseisoen
van ons lewens verteer

en ’n kartonkoppie koffie
om die stadsgedruis te sluk
voor die Eskom-sterre
ons na ons drome terugruk.

Want my saad het ontkiem
op sentimentele grond
en jy – ’n lugbesoedelde
sonsak – soen op my mond.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top