Onderhoud: Hannes van Wyk oor Vroue na aan my hart

  • 0

hannesvanwykVroue na aan my hart
Hannes van Wyk
Uitgewer: Human & Rousseau
ISBN: 9780798172646

Liné Enslin gesels met Hannes van Wyk oor Vroue na aan my hart.

Jou loopbaan tot dusver getuig van talle ure voor die kameras – op stel en verhoog. Was daar ’n enkele ervaring of oomblik van gewaarwording wat jou oortuig het om agter die kameras in te verdwyn en agter die lessenaar te gaan sit om ’n boek saam te stel? 

Ek is eerstens ’n akteur en aanbieder. Dit is waarvoor ek opgelei is en wat ek ken. Ek was gelukkig om al in my loopbaan wonderlike rolle te speel en onderhoude te voer. Om ’n boek te skryf was nooit op my lysie nie. Ek sal myself ook nie uitgee as hierdie wonderlike skrywer nie. Die boek Vroue na aan my hart was ’n hartsprojek en ek wou graag hulde bring aan vroue wat al so baie vir my beteken het in my lewe en loopbaan. Vroue vir wie ek ongelooflike respek het en baie lief voor is. Ek glo ook mense moet dankie sê en hulde bring aan mense (vroue) terwyl hulle nog daar is, en dit is die groot rede vir die skryf van die boek. Dit is ’n eerlike boek oor hoe ek die vroue ervaar en wat ek van hulle dink. Vroue soos Sandra Prinsloo, Brümilda van Rensburg, Christine Basson, Lizz Meiring, en so kan ek aangaan (40 vroue wat ek uitsonder in die boek). Die feit dat die boek baie goed ontvang is, is natuurlik ’n bonus.

Vroue na aan my hart is opgedra aan jou ma. Watter van jou ma se eienskappe het ’n groot indruk op jou gemaak en daartoe gelei dat sy die tipe vrou is wat jou inspireer? 

Ek kan onomwonde sê dat ek die beste ma in die wêreld het. Sy en my pa (wat twee jaar gelede oorlede is) was gewone salaristrekkers en ek is seker hulle moes hulself baie keer te kort doen om vir hulle kinders alles te gee. My ma is vandag 82 en in die aftree-oord in Aliwal-Noord en ek het alles wat ek in my lewe bereik het aan haar te danke. Sy is die een na wie toe ek gaan as ek twyfel oor groot besluite, raad nodig het, ens (selfs op 82). Sy het soveel wonderlike eienskappe. As ek ’n paar kan uitsonder, sal dit wees haar lojaliteit, stiptelikheid, deernis met mense, om altyd op te kom vir die “underdog”, haar geloof, die manier waarop sy mense behandel, en so kan ek aan- en aangaan.

Was een van die oogmerke van die boek ook, soos jou praatjies by vroueoggende, om ander vroue te inspireer en te beklemtoon dat elkeen belangrik is? Of wat sal jy graag wil hê lesers uit die boek moet put?

Ek tree gereeld op by damesdae en vroueoggende, wat ek baie geniet. Ek het so ’n 40-minute-program waar ek hulde bring aan vroue ... die dames huil so ’n bietjie en lag ook baie. Dit is ’n motiveringspraatjie met gedigte, prosa en ook net gesels uit ’n man en seun se perspektief oor ma’s en vroue. Wat ek wou regkry met die boek, is dat vroue sal besef dat dinge waaroor Sandra Prinsloo haar bekommer, bekommer hulle hulle ook oor; dinge wat vir Brümilda snaaks is, is ook vir hulle snaaks. Dit het ek gedoen aan die hand van persoonlike staaltjies oor die bekende vroue. Dit is ’n eerlike “kykie” na hoe ek die vroue ervaar

Die aanslag wat jy in jou onderhoude en benadering tot mense se
verhale volg, getuig van mensekennis en empatie. Is dit iets wat nog altyd vir jou natuurlik was? Of het dit ontwikkel uit jou ervaring en interaksie met mense?

Baie dankie vir die mooi kompliment. Ek glo (en het dit al baie gesê) dat goeie navorsing van kardinale belang is. Jy moet alles weet van die persoon van wie of onderwerp waaroor jy praat. Dan glo ek eerlikheid is ook baie belangrik. Ek probeer vrae vra wat die mense by die huis en voor die kassie wil weet. Ek het oor die algemeen ’n deernis met mense en sal nie vrae vra wat ek nie gevra wil word nie.

Benewens die onderhoude met vroue wat in jou boek verskyn en die verhoudinge wat jy met die jare deur jou werk opgebou het, het jy ook al onderhoude met bekendes soos Bill Clinton, Nelson Mandela en Arnold Schwarzenegger gevoer. Hoe kom jy by die hart van mense se stories uit? Hoe kry jy dit reg om werklik uit te pluis wat vir mense belangrik is en wat hulle lewensuitkyk is?

Ek was gelukkig om al met regtig baie mense onderhoude te voer, plaaslik en oorsee. Ek is/was gelukkig dat mense nog altyd oopgemaak het teenoor my. Ek wil glo dat die rede daarvoor is dat hulle my vertrou en weet ek sal nie vuil wasgoed was nie. Dit beteken nie dat ek nie by die kruks van die “saak” wil kom nie. Nog ’n belangrike feit by enige onderhoud is om te luister na wat die persoon sê. Die onderhoud gaan nie oor jou, die onderhoudvoerder, nie.

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top