Mediavrystelling: Ons kom van vêr, ’n gesprek oor taal en identiteit op Wellington

  • 1

 

Die Afrikaanse Taalmuseum en -monument (ATM), Wellington Museum en die Breytenbach Sentrum vier vanjaar op Saterdag 18 Maart 2017 gesamentlik Internasionale Moedertaaldag en Menseregtedag met ’n spesiale byeenkoms op Wellington. Moedertaaldag word sedert 2008 jaarliks wêreldwyd gedenk om taal- en kulturele diversiteit en veeltaligheid te bevorder.

Abraham de Vries sal ’n gesprek oor die tema “taal en identiteit” lei met vyf Wellingtonners,  naamlik Herman Bailey (oud-burgemeester), Marlene le Roux (hoof van Kunstekaap, voorsitter van die Stigting vir Bemagtiging deur Afrikaans), Edwena Goff (kerkleier, voormalige Mej Afrika-Suid), Patrick Mettler (onderwyskundige) en Mary Anne Plaatjies Van Huffel (moderator van die Verenigde Gereformeerde Kerk). Hulle is almal medeskrywers van die nuwe boek Ons kom van vêr, wat bydraes oor bruin Afrikaanssprekendes se rol in die ontwikkeling van Afrikaans insluit.

Ons kom van vêr bekendgestel

Wannie Carstens (taalredakteur) en Michael le Cordeur (inhoudsredakteur) sal dié gedenkboek, opgedra aan Adam Small, bekendstel. Die boek sal ook te koop wees. Volgens die skrywers is die boek se grootste waarde dat dit die stigma dat bruin mense nie ’n stem het oor Afrikaans of ’n bydrae te maak het tot Afrikaans nie, weerlê. Die skrywers toon aan dat Afrikaans nie net die taal van apartheid was nie, maar ook die taal van die struggle en versoening.

Die Paarlse kunstenaar Gaireyah Fredericks, van wie ’n gedig in die boek ingesluit is, sal gedigte voordra. Nedine Blom en Jawaahier Petersen van die Jaloersbokkies sal gaste vermaak met hul Afri-Kaapse liedjies. Die plaaslike Klopse-groep Caledonian Roses sal ook optree. Die funksie begin om 10:00 in die Bôrdienghuis van die Breytenbach Sentrum in Burgerstraat. Bywoning is gratis en sluit ligte verversings in, maar plek is beperk. Bespreek by Nkita Pietersen by 021 863 0543/2 of student@taalmuseum.co.za.

Jaloersbokkies Nedine Blom en Jawaaihier Pietersen (Foto: Kristina Foster)

 

Spesiale Moedertaaldag-program vir skole

Die ATM het gedurende Februarie ’n spesiale opvoedkundige program ter viering van Internasionale Moedertaaldag aangebied. Sewe skole (Hoërskool Spine Road, Imboniselo Primêre Skool, Houtbaai Internasionale Skool, Active Tuisskool Akademie, Laerskool WA Joubert, Klapmuts Primêre Skool en Hoërskool Stellenbosch) het die museum vir ’n multimedia-aanbieding en die monument vir ’n opvoedkundige toer besoek. Vir meer inligting oor die ATM se opvoedkundige programme, kontak Janine Brown by tel 021 872 3441 or opvoeding@taalmuseum.co.za.

  • 1

Kommentaar

  • Erik Van der Straeten

    Zeer geslaagde voorstelling. Zelfs beter dan op het 'Woordfees'. Ook door het aanwezige publiek. Het optreden van de Caledonian Roses (Klopse) was schitterend. En ook de Jaloersbokkies waren op hun best. Een belangrijk boek dat elke blanke zuid-afrikaan moet lezen. Maar ja? In het publiek zaten ze alvast niet. En dat is jammer.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top