Liefde is ... Inskrywings (VIII)

  • 1

Hier verskyn nog inskrywings wat vir LitNet se skryfkompetisie "Liefde is ..." ontvang is.

Inhoud:

  • Bianca Erasmus
  • Sonja Mac Lachlan
  • Joha van Dyk
  • Elisabeth Nortje
  • Welmi Janse van Rensburg
  • Amorine Strydom
  • Riaan le Roux
  • Rehan Boonzaier
  • Anri Basson
  • Sanmarie Hugo
  • Erma van der Merwe
  • Mieke du Preez
  • Karen Simpson
  • Werner Wehmeyer

 

Bianca Erasmus

Liefde is ...

Liefde is gil, liefde is skree.
Liefde is om nog ’n kans te gee ...

Liefde is vra, liefde is ontvang.
Liefde is ’n sagte soen op my wang ...

Liefde is lag, liefde is sag.
Liefde is dans tot laat in die nag ...

Liefde is glo, liefde vertrou.
Liefde is die kans wat ek vat met jou ...

Liefde is lig, liefde is vry.
Liefde oorkom die spasie tussen jou en my ...

Liefde is hoop, liefde is verstaan.
Liefde is ons wat nooit sal vergaan ...

Liefde is loop, liefde is draf.
Liefde is geselsies tot laat in die nag ...

Liefde is veilig, liefde is braaf.
Liefde is ons aan mekaar verslaaf ...

Liefde is suiwer, liefde is eg.
Liefde is ek en jy wat altyd vir mekaar sal veg ...

Liefde is lewe en liefde is dood.
Liefde is jy wat my nooit weg sal stoot ...

Liefde...?

Liefde is ... Jy. Vir my.



 

Sonja Mac Lachlan

Liefde is sagte pienk wolkies waarop ons sweef
pienk malvalekkers, love notes en tjoklits
en ons drink mekaar in soos pienk sjampanje
ons glase loop oor

Liefde is die dag toe ek wasig wit na jou toe gestap het
jou asem was weg

Liefde is toe die berg op die tafel lê en wroeg van die pyn
toe was ons drie

Liefde is ’n plekkie van ons eie waar ons lief het, huil, lag, kwaad word
ons groei

Liefde verander … dit skree en wroeg en baklei
ons wil opgee

Maar liefde is ek en jy en bly in my
wanneer ek na die gat kyk en
jy verdwyn.


 

Joha van Dyk

’n ode aan bukowski

liefde is dobbel
liefde is die blou kol op haar arm

liefde is die boom waaronder jy rook,
jy wat altyd laat is en ek wat nog steeds wag,
hy wat na die einde nog gedigte skryf
liefde is sy baadjie wat hang oor jou stoel

liefde is koffie in die Neelsie
liefde is riots op die Rooiplein

liefde is ’n Spaanse meisie in Spanje
en ’n Afrikaanse meisie in Afrika

liefde is ’n sold-out show en narkotiese dwelms

liefde is die nugter seun
liefde is die ou wat slapdronk teen jou gebou sit
en jou flat bel tot twee uur in die oggend

liefde is die ry by ’n klub waarin almal wag,
maar niemand in wil wees nie

liefde is Victoria, Andringa en Dorpstraat,
dit is drag race in Merriman

liefde is die bergie onder ’n geleende kombers
liefde is jy wat wakker raak in my bed

liefde is die diewe,
die kriminele,
die leuenaars

liefde is jy wat my laat dink aan hom
al is vier jaar verby en jou oë helder in my geheue
helderder as syne

liefde is jy wat nie opdaag nie

liefde is jy op my bank met my kitaar op jou skoot
liefde is die liedjie wat jy nooit vir my gaan skryf nie

liefde is sy humeur in verkeer

liefde is die snaar wat krul en breek
liefde is die pick wat weg is

liefde is die R20-bundels in Protea
liefde is die horlosie wat stilstaan,
die lekkende pyp
’n kriekplaag, luid en teenwoordig en swart

liefde is die gedig wat nie klaarkom nie

liefde is die kers se vlam wat doodblaas,
die parfuum op jou baadjie
liefde is my naam op sy arm in permanent marker asof môre nie saak maak nie

liefde is die sleutel verloor
en die sekuriteitshek skud

liefde is die liedjie wat my sinne verdrink,
die amp wat blaas,
die staties op die radio

liefde is goue naels en koperringe
liefde is teleurstelling,
jou skadu by die voetenent van my bed net voordat dit verdwyn
en alles net donker is
liefde is hy wat ten spyte van jou my laat beter voel

liefde is ek wat my hand by die venster uitsteek
en jy wat die musiek harder draai
liefde ry doelloos rond net om langer te bly

liefde is waterbeperkings in ’n ramp-sone

liefde is nie altyd ’n jackpot nie


 

Elisabeth Nortje

Die laaste liefdesgedig

Daardie diep donker niks
wat oor my harsings spoel
die versamelde dwalings van my wanhopige hart,
is die poel waarin ek vanaand my hande was
van die gebreke van my liggaam en gees
wat in jou geen aanklank vind
waarin my spyt met geen maatstaf omskryf kan word 
waar siel en murg en been
aan geen godgegewe relaas waarde kan verleen,
want daar kan geen meer pretensie wees
soos die sluier wat val van ’n warm wintersdag
dat ek geen uitweg kan vind, vir die liefde wat my aan jou verbind.


 

Welmi Janse van Rensburg

Jou legkaartwoorde

Jy prikkel-vryf woorde
 letter vir letter
in die palm van my hand
 en dit laat raaisels
en puzzles in my kop
totdat ek dit alles ontsyfer.
Jou letters word woorde
en jou woorde word gedigte
wat net deur die hart
verstaan kan word.


 

Amorine Strydom

Sonnet vir my beminde

In die gloed van die agtermiddagson
Was als in armmansgoud gekleur.
In taai geel het die lug stadigaan verveer
... soos die vale voornag ook na my toe kom.

In die skynsel van die maan
Was als in goedkoop blink gedoop
Soos wat ’n kers se was vanself oorloop
... wagtend dat die siklus weer aangaan.

O my beminde, bring jou goue kostelose son
Laat jou silwer maan oor my droë liggaam streel
en weereens vir ’n ruk my dorre siel kom voed.
O my beminde, my stille liggaam blom
oop – soos jou maan se strale my gees beveel.
O God van maan en son, sal jy hom vir my behoed?


 

Riaan le Roux

Liefde is ...

mekaarversorging
omgee wat alles deurstraal
hoekom ons hart klop

 

Rehan Boonzaier

Uit die niet gemanifesteer
oombliklik het dit gebeur
ruk my uit my oujongkêrelskap
magnetisme versteur my slakkegang
oer vlamme bars op my vlakte uit
stuwende emosies skaalwip lig na swaar
dis sy! oplaas gekry! dis myne! dis haar

Haar glimlag verpletter my eensaamheid
geringste bewegings onopsetlik opsetlik
kaats beloftes met onskuld na my gemik
laat wilde perde in my galop
wat dawerend in my slape klop

So word liefde in my gebore
die een net vir my beskore
objek van my hart se minnelied
deur kupido se pyl en boog geskiet


 

Anri Basson

Liefde is,
’n gedig
oor ’n glimlag
op iemand se gesig.

Daardie
stukkie
hemel-op-aarde.

Liefde is
’n fassinasie
wat kan dans tot
inspirasie.

Jou hart wil
’n liedjie
sing.

Liefde is,
bottervliegies
wat jy bo die
wêreld sal kies.

Dit is heimwee
na daardie
spesiale mens.

Liefde is
daardie klein
dorpie-gevoel
beter as wyn.

Dis ’n silwer randjie
onvergeetlike
gevoel.

Liefde is,
soos die maan
wat nooit sal
vergaan.


 

Sanmarie Hugo

’n Ma se liefde

Ek is soos die lug is vir ’n seemeeu

  • ek skep ’n ruimte waarin jy jouself kan vind

Ek is soos die aarde is vir ’n boom

  • ek gee standvastigheid en voed jou

Ek is soos ’n berg is vir ’n avonturier

  • ek is altyd daar

Ek is soos die hartseerliedjie is vir een wat verlore voel

  • ek troos jou

Ek is soos endorfien is vir ’n atleet

  • ek lig jou op

Ek is soos ’n ploeg is vir saad

  • ek berei ’n weg vir jou

Ek is soos ’n half aan die slaap buurman is vir ’n partytjie langsaan

  • ek luister sonder om in te meng

Ek het jou lief my kind. Ek is jou ma!


 

Erna van der Merwe

Liefde is jou arms om my lyf
In jou hart my wese ingesluip
Ek en jy – twee ringe, blink gevryf
Fondamente in geloof geslyp
Daarom kan ek jou altyd by my hou
Ek is vir ewig lief vir jou


 

Mieke du Preez

Liefde is ... jy

met stormwaters
wat my lewensboot
rondruk en wegstoot
van waar ek moet wees,
bid ek vir vrede oor die
stormwaters
of standvastigheid vir my
lewensboot.

met jou groenblou oë
bring jy vrede oor die see
van my lewe

met daardie sagte
seesand-hare wat so
maklik deur my vingers vleg
bring jy vrede oor die see
oor my hart

met jou bemoedigende woorde
wat op ’n ontmoedigende dag
so maklik oor jou lippe rol,
bring jy vrede oor die see
oor my siel

jy is die anker in my lewe,
jy laat my lewensboot
standvastig staan in
tye van stormwaters.


 

Karen Simpson

Liefde is ...

Soos heuning op toast of vir haar ’n gediggie te post
Dis ’n glimlag hier en daar en sommer net na mekaar te staar
Mooiste en beste vir mekaar te hê en sommer net langs mekaar te lê ...

’n Sambreel teen die reën en stel die ander altyd eerste en weet dis meeste dat ons beste maatjies is, net soos hulle is
Doen dinge saam sonder versmoor en moenie probeer verander nie

Lag en hande vashou is die ding
Soentjies gee op hele gesig sonder ophou en soms die wasgoed en skottelgoed te was
’n Stem wat fluister hoe dierbaar jy is

Nooit alleen of kwaad bed toe te gaan en hy of sy ’n traan te vang
Die Here saam te dien en al Sy seëninge te sien en verdien
Te weet dat liefde is ... die kern van ons geloof


 

Werner Wehmeyer

Vir ewig in liefde

In die eenvoud
van elke môre,
vou ek myself oop
in jou borsholte
waar jou hart kaalvoet wag.

Jy ruik skoon in roos
as jy rank teen my,
jou vingers welig
wat my tydloos bemin.

Ons (ontmoet)
waar moulose arms
die passievuur aansteek;
lippe gloei ’n hittegolf.

My lyf (horisontaal)
word jou lêplek, verblyfholte,
tot ek myself anker
in die bloeisel van jou vrouwees.

Ek + jy = volkome(liefde); vir ewig.

  • 1

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top