Liefde is ... Inskrywings (VII)

  • 0

Hier verskyn nog inskrywings wat vir LitNet se skryfkompetisie "Liefde is ..." ontvang is.

Inhoud:

  • Marita Coetzee
  • Madelein Klopper
  • Estia Riekert
  • Melissa Grobler
  • Mariette Marais
  • Dorette Gower
  • Karin Nieuwoudt
  • Emmie Bedeker
  • Sanet van Tonder
  • Theuns de Bruyn
  • Melissa Ludick
  • Henlie Barnard
  • Melanè van den Berg
  • Evanthe Schurink

 

Marita Coetzee

Ek trap in jou spoor
soos ’n wellustige hond
ek besnuif jou feromone
en proe jou in my mond

ons dans in die maanlig
deur sterre bestraal, betotteld
ons sluimer in dag-se-lig
verlam tot aand toe verlore

jy wag vir die volmaan
om die son te vang
jy laat vingers hetig gaan
paaie maak oor lyf en gees

ons vind mekaar weer
in oggendson se gloed
ons weet wat liefde is
volrond en bittersoet


 

Madelein Klopper

Hy wag al amper 15 minute vir my,
maar as ek oor die trapreling loer
sien ek daardie sagte glimlag wat ek so beny,
dit weet ek – weliswaar – die liefde is geduldig.

Sy oë glinster, glimlag sag
toe ek stadig die trappe afloop.
“Hallo jy,” klink sy stem skor en hy lag
Ek plaas my hand in syne en
glimlag, want die liefde is vriendelik.

Dis al amper ’n dekade ons tradisie
om Valentynsdag so te vier.
Soos kinders, liefde – die enigste visie –
want liefde glo alles, verdra alles.

Ons wens op hierdie spesiale geleentheid,
altyd dieselfde,
om mekaar te seën met liefde en gelukkigheid,
om volgende jaar dit weer te vier.
Want die liefde hoop alles.


 

Estia Riekert

Liefde is
jou arms om my
na ’n moeilike dag
vreeslose vertroosting

liefde is
jou moue opgerol
maak my lewe beter
my super man

liefde is
om saam dinge te doen
bid, oefen en nog meer
my persoon

liefde is
die kyk in jou oë
die vat van jou hand
die snork in my bed

jy is liefde


 

Melissa Grobler

Liefde is,
beloftes oor die son en die maan

maar

ek voel nog steeds hoe my doene spartel om rein te bly,
My intensies, wat selfsugtig mense verlei 

te vermy

ek moet bid vanaand,
ek sal die verontagsaming
afstry


 

Mariette Marais

Liefde is die vat van ’n vriendin se hand 
in dae van smart

of die opgewondenheid van lieflinghond stertswaaiend
as die lewe se lawaai deur my draai ...

en torring aan my siel

as ek verniel, alleen probeer swem
in ’n stormsee van seer

en iemand, met sy ruwe baard, sag, teer, met ’n koppie koffie rustig en wys

luister en troos, en my brose hart
weer laat blom soos ’n roos.

Liefde is Deel. Liefde is Heel. Liefde is Hoop. My anker in tye van nood.


 

Dorette Gower

Die liefde, o die soete Liefde ...

Dis so vreeslik mooi,
Getooi in die rooiste rooi

Dit laat my dink,
Sommer vinnig en flink

Dis soet, en ek voel so goed

Liefde roep my naam en sê kom neem my saam

Ons gaan soen, alles saamdoen

Vry en ook soms oor dinge stry

Partykeer is dit grou maar die lug is altyd blou

Sit my neer en sê weer

Ek is lief vir jou!

(Vaaltynsdag ... 2018)


 

Karin Nieuwoudt

liefde is
die klamheid van jou lippe
strelend
onbeskaamd verskuif
oor die kuiltjie
van my wang
en geharnas
in veilige
arms

liefde is
verwondering in my kyk
wanneer my oog
jou beeldmooie gelaat
vasvang
en bêre in die holtes
van my hart

liefde is
wanneer
ek jou in ontwapening met
swanger minnetaal
betrou
en uiteindelik my hoogliedtempel
aan jou
toevertrou


 

Emmie Bedeker

Lieflied

die hotnotsvy
o, die hotnotsvy
as jy kan dans
mag jy my kry

die kalbaspyp
o, die kalbaspyp
ons staan om die hoek
om die kat te knyp

die jaargety
o, die jaargety
as die winter kom
lê jy by my

die bonesop
ja, die bonesop
kos vir die winter
saam met ’n dop

die kakiebos
o, die kakiebos
verneuk jy my
gaan ek jou los

die kakkerlak
o, die kakkerlak
ek sal nog nooit
jou hart vertrap

die grondgeitjie
o, die grondgeitjie
alleen in die veld
vang ons ’n vrytjie


 

Sanet van Tonder

Liefde is Karoo

Liefde is ’n druppel water wat die
dorre oopgeskeurde aarde keer op keer voed
Liefde is ’n windpomp wat draai in die kaal Karoo
en alles wat lewe het lok om van die lewende water te kom dors
Liefde is die Kamdeboo-rotse wat oopgebars in die snikhete son bak
Liefde is ’n witkruisarend wat soekend na ’n prooi bo in die blou draai
Liefde is ’n spekboom wat in somers en winters met of sonder water
sy groen blare uitstoot

Liefde is om die grys pad kilometers ver te stap
Liefde is stukkend, tog is liefde hoop
Liefde is Karoo


 

Theuns de Bruyn

Liefde is ... Jy

Liefde is ...
Jou naam.
Liefde is ...
So bietjie skaam.
Liefde is ...
Daardie skelm soen wat julle deel
Liefde is ...
Daardie kyk wat julle saam deel

Liefde is ...
Jou naam.
Liefde is ...
As ons hand aan hand saamstaan.


 

Melissa Ludick

die negatieffilm van ons saamgedra in my nylongatsak
(jip, ek het vergeet om by Kodak te stop)

 Liefde is ...

die karmosynrooi kersie op ons (gedeelde) sneeubergbederf by Milky Lane – tydens kaalvoet kindsdae sou die skoolbus hier stop

 Liefde is ...

jou vingers in myne geweef soos my hennahare jou borsbed beroof
en jy goedsmoeds vir my fluister: 
"jongejuffrou, in Christuswater is ons ewigheid gedoop"

 Liefde is ...

die ontdekking van háár buustelyfie in jou knortjor 
braak dwarrelwolkflits op Golgota,

en jongeman, nou, in Christuswater het ons ewigheid versuip.


 

Henlie Barnard

Liefde is ...
Jou hand
op my wang
sonder dwang
of bang.

Jou mond
op my mond
in die oggendstond
nooit gebonde.

As ons verskil
is dit nooit kil
nie eens koud.
Jy my behoud.

As jy weggaan
wat ek wel verstaan
is my dae sonder welbehae
Sonder enige welslae.

Liefde is, jy by my
jy net jy ...
ek net ek
liefde is, ek by jou.


 

Melanè van den Berg

DIT is die liefde

Grensloos,
beskermend …
en goed.

Vol geloof,
toeganklik …
en groet.

Eindeloos,
afwagtend …
en voed.

Volmaak,
kinderlik …
en soet.

Dis Satanloos.
Dis Goddelik,
en ’n MOET.


 

Evanthe Schurink

Liefde is ’n simfonie

word stil en luister my geliefde
na die eggo van ons harte
vingers vlinder oor akkoorde
speel onbekende note
huiwerig sag die melodie
stil stom sonder woorde
leer ons saam ’n nuwe lied

vingers         \/          snare
gly oor          harte
oor

luider klink ons simfonie
toegevoude roosknopblare
vou oop in prag en glorie
ons verdrink in mekaar se wese
word saamgesleur deur ons melodie

dawerende akkoorde
ek pluk die sterre in jou oë
jy fluister sag my naam
as die laaste klanke wegsterf
smelt twee siele saam

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top