Huis, woning, tuiste: Huis (Aan die einde van ’n lang dag)

  • 4

Huis
(Aan die einde van ’n lang dag)

’n oranje kombersie
beskerm teen die onbegrip van buite

downloads van ander se lewens bring
tydelike ontsnapping van jou eie

sussende melodieë van groewe
gesny uit polikarbonaat

die reuk van koffie
en van spek in ’n pan

die geluid van ’n prop
uit ’n bottel gefermenteerde vog

sagte, vergewende lig van
energiespaar-lampe

lawende druppels van ’n warm stort
was die frustrasie weg

geselskap en teenwoordigheid
van dié wat jou verstaan

’n kooi in wit
bolster teen onbegrip

ruimte vir wees
wie en wat jy wil

 

Vooruitsig

Soos die swart en wit klawers van ’n klavier
lê die maan se lig
op die sinkplaat golfies
van die water voor jou.

Na regs weet jy
pronk die berge
met hulle
wit sneeu-doilies.

Anderkant toe,
daar waar ’n dowwe lig
die wolke verhelder,
waak die stad
oor die einde van die meer.

Voor jou fluister
’n houtbank met wit kussings,
“Kom sit op my en geniet die uitsig.”

In die skadu van ’n gepotte plant
knik ’n kersie
deur die gekerfde patroon van sy houer
“Ja, ja, dis ’n goeie plan.”

Jy glimlag,
skop jou skoene uit,
gooi twee glase groenvars wyn
en sê,
“Kom stoep toe skat, vertel my van jou dag.”


 

Klik hier vir volledige inligting oor die kompetisie.
Klik hier om ander inskrywings te lees.

huis1_650

  • 4

Kommentaar

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top