Groot Romanwedstryd 2018: Ingrid Winterbach

  • 0

Foto: Naomi Bruwer

Ingrid Winterbach het pas die eerste prys in die Groot Romanwedstryd 2018 verower. Sy gesels met Naomi Meyer oor haar wenverhaal.

Ingrid, baie geluk met die groot toekenning! Vertel my iets van “Die troebel tyd”, asseblief. Van jou karakters, waar hulle hul bevind, of van die storie se plot.

Magrieta Prinsloo, ’n dierkundige, se kop haak uit op die verkeerde antidepressant. Sy bedank haar werk by die universiteit en aanvaar ’n betrekking by die Buro vir Voortgesette Onderwys. Sy moet met mense (“agente”) hier en elders in die Wes- en Oos-Kaap skakel. Op ’n dag verdwyn Markus Potsdam, haar baas. Haar Buro-opdragte bring Magrieta in aanraking met onder meer ’n sg meganiese eend, ’n uitgespoelde walvis, en ’n vrou wat vir haarself ’n tent in die wingerd opgeslaan het.

Die absurditeit van die alledaagse is iets wat die beoordelaars in jou teks beklemtoon. Is die lewe iets waaroor jy lag, waaroor jy huil, of watter ander skakerings wil jy uitlig?

Ek vind dat daar altyd genoeg is om oor te lag, maar ook om oor te huil, en genoeg waaroor mens net in stomme verbystering kan staan. Trouens, niks wat ek kan uitdink, kan meeding met sommige van die absurditeite van die Suid-Afrikaanse lewe nie.

'n Paar maande gelede was jou grafiese kuns op uitstalling, 'n paar weke gelede 'n teaterteks wat jy geskryf het te siene by die Woordfees (en nou weer, by die KKNK). Wanneer het die roman gebeur? En hoe kruisbestuif al jou verskillende kunstalente mekaar?

Daar was miskien ’n mate van kruisbestuiwing tussen die roman-in-wording en sommige van die tekeninge wat ek in 2016 gemaak het – maar niks regtig noemenswaardigs nie. Die idee wat uiteindelik tot die Freaks-dramateks gelei het, het al in die laat ’90’s ontstaan, en daaruit voortspruitend het ek ’n reeks tekeninge gemaak, gebaseer op ’n voorstelling van Saartjie Baartman. Hierdie “portret” van Saartjie duik trouens nou nog in my tekeninge op.

NB-Uitgewers se Groot Afrikaanse Romanwedstryd 2018: Wenners aangekondig

Groot Romanwedstryd 2018: Jaco Fouché

Groot Romanwedstryd 2018: Debbie Loots

Groot Romanwedstryd 2018: Gerhard Greyvensteyn

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top