Greg Sherwood by die Hemel-en-Aarde Pinot Noir-viering

  • 0

 

Daar is mense regoor die wêreld wie se passie vir Suid-Afrikaanse wyn ooglopend is binne die eerste vyf minute nadat julle blad geskud het. Greg Sherwood is een van hulle, vertel Maryke Roberts.

En hoewel hy die afgelope 16 jaar in Londen woon, is Suid-Afrika sy geboorteland. Sy oorsese proeë en praatjies laat doem die sonskyn en terroir van Suid-Afrika by kliënte op en as hy jou eenmaal oortuig het van hoe goed Suid-Afrikaanse wyn is, is daar geen omdraaislag nie.

Greg kuier in Suid-Afrika en is die naweek die gasspreker by die Hemel-en-Aarde Pinot Noir-viering. Hy beskou die uitnodiging as ’n reuse-eer en gaan gesels oor die potensiaal van Suid-Afrikaanse Pinot Noir, mits dit in die regte terroir en streke groei. “Vanuit ’n kwaliteitoogpunt is dit beslis meer suksesvol in Suid-Afrika as druifsoorte soos Merlot – een van die rooi variëteite wat die meeste aangeplant word.”

Hy reis so drie, vier maal per jaar na Suid-Afrika, omdat hy heelwat vriende en familie hier het. Hy gryp dan ook die geleentheid aan om nuwe wyne te proe, op hoogte te bly van nuwe verwikkelinge in die wynbedryf of as spreker op te tree. “Dit wil my voorkom of inligting oor die binnewerkinge van wyn koop en verkoop – wat al vir my tweede natuur is – baie interessant is vir wynmakers en produsente.”

Hy sê hy weet bekende wynjoernaliste beskryf Suid-Afrika tans as die opwindendste wynstreek in die wêreld, “maar ek sê dit al vir meer as tien jaar. Nou is daar net nog meer goeie wyn en nog meer opwindende jong produsente.

“Die toekoms kan nog meer rooskleurig wees as produsente ’n intelligente strategie volg en aandag aan die fynere besonderhede gee,” glo hy.

Die Suid-Afrikaans wynbedryf besit 10% van die totale wynmark in die VK, waarvan slegs 4% bó die £6/bottel-vlak is. Kundiges glo die bedryf se doelwit moet £9 en hoër wees. Volgens ’n onlangse Nielsen-verslag is die gemiddelde prys waarteen Suid-Afrikaanse wyne in die VK verkoop,  £4,78 pond. Chili klop ons met £5,31 as gemiddelde.

Maar met die voortgesette toewyding van mense soos Greg word persepsies – en prysmarges – verander.

Hy sê: “Suid-Afrika het nie juis ’n toekoms om goedkoop wyne te verkoop nie. Ons toekoms lê noord van die £10/bottel-pryspunt. Die £18–22/bottel-kategorie is ’n baie winsgewende een as jy jou kwaliteit, verpakking en storie reg het!”

Hy sê goeie etikette is noodsaaklik en hy kyk altyd na die klassieke Italiaanse etikette, want hulle kry dit reg. “Wyn is meestal ’n luukse produk en ek glo die etiket moet die nastreefwaarde van goeie wyn weerspieël.

“Jy moet met jou wynverkoper kommunikeer. Bly by die klassieke ontwerp, maar sluit so ’n bietjie geskiedenis en karakter in. Maar dit moet goed vertoon en kwaliteit uitbasuin.”

Greg sê die dae toe mense sekere goeie variëteite aan sekere lande toegeskryf het, is iets van die verlede. Die gonswoord is nou “streekseienskappe”. “Ons klante weet dat sekere variëteite beter in sekere streke aard en hulle vra daarvoor.” Hy glo die aanplantings op enige plek om enigiets te kweek, is verby. “Dit gaan al hoe meer produsente se hooffokus wees met die herbeplanting van wingerde of nuwe aanplantings.”

Hy vertel dat sy vroegste herinneringe aan wyn die dae is toe sy diplomaat-pa belangrike gaste van regoor die wêreld onthaal het met Meerlust Rubicon 82, KWV Roodeberg en Nederburg-veilingwyne van 1974! “Regte ikone destyds en steeds vandag,” vertel hy.

Hy het nog nooit tevore enige gunstelingwyne uitgesonder nie, maar vertel dat hy nou, soos hy ouer word en sy smaak verander, verlei word deur die Ouwêreldse klassieke wyne: Boergondië, Bordeaux en Piedmont, en veral Barolo. “Ek is mal oor die elegansie, selfbeheersing, geskiedenis en ouderdomswaardigheid van die ou landgoedere. Dit fassineer my.”

Handford Wines, waar Greg die senior aankoper is, hou gereeld SA-proeë, maar ook gereelde, spontane proe-aande, veral wanneer hulle hoor daar is ’n Suid-Afrikaanse wynmaker in Londen.

“Die begeleide proeë neem baie langer om te reël, want dis tydrowend om al die oesjare en raar wyne bymekaar te kry. Ek wag vir die 2014 MR de Compostella-vrystelling aanstaande jaar, sodat Bruwer Raats kan kom en vir my top-privaatklante ’n 10-jaar retrospektiewe proe tot 2004 kan doen. Dit sal ’n epiese gebeurtenis wees.”

Hy lag en sê hy beplan ook ’n Eben Sadie-meesterklas met van sy oudste wyne, maar om Eben in Londen te kry is ’n ander storie – veral as die branders mooi is en “Eben” roep, vertel hy met ’n knipoog.

Hy glo die grootste fout wat Suid-Afrikaanse produsente maak, is om uit te gaan en wyn te maak voor hulle weet wie die mark is. “Jy moet wyn maak en verpak met ’n spesifieke verbruiker in gedagte.”

En voor ons moet groet, wonder ek watter wyn Suid-Afrika se grootste suksesstorie in die VK is.

“Wit versnitte! Ook vars witwyne; die diversiteit van terroirs; diversiteit van druifvariëteite en die groot persentasie ou wingerde in Suid-Afrika. Hulle is mal oor die Boergondië-styl chardonnay, en hoe kan mens nie lief wees vir die Old Vine chenin blanc nie!”

Greg se loopbaan

Gregory Sherwood is op 1 November 1971 in Pretoria gebore. Hy is die seun van ’n diplomaat en het die eerste 21 jaar van sy lewe die wêreld saam met sy ouers platgereis. Dis met al die sosiale verpligtinge wat die loopbaan meebring dat hy sy liefde vir wyn ontdek het.

Hy behaal sy graad in besigheidsbestuur en bemarking aan die Webster-universiteit, St Louis, Missouri in die VSA en werk vir sakgeld as kelner by ambassadepartytjies. Hier kry hy gereeld met baie interessante wyne te doen. Hy begin sy loopbaan as kommoditeithandelaar in Sandton.  Hier herontdek hy sy passie vir wyn en behaal in 2000 sy wyndiploma by die Kaapse Wynakademie in Johannesburg. Greg vertel dat die passie vir wyn weer opgetel is om van ’n stresvolle dag by die kantoor te vergeet!

Hy verhuis in 2000 terug Europa toe en besluit om ’n loopbaan in wyn te ontgin. Hy glo Londen is die middelpunt van die gesogte wyne van die wêreld en hier kry hy die geleentheid om saam met die grootste wynpersoonlikhede van die moderne era te werk.

Hy werk van 2000 tot 2006 as bemarkingsbestuurder vir Fine Wines en daarna as die senior wynkoper vir Handford Wines in South Kensington, Londen. Saam met Handford Wines se eienaar, James Handford, ook ’n wynmeester, kry hy die geleentheid om van die wêreld se gesogte wyne te proe, te koop en te verkoop.

Hy slaag sy wynmeester-proedokumente in sy eerste probeerslag in 2004; voltooi sy teoretiese eksamen in 2006 en die wynmeesterdissertasieproses in 2007 met die titel “Method Cap Classique Production in Constantia, South Africa”. Hy word Suid-Afrika se vierde wynmeester.

Hy probeer die hoeveelheid beoordeling van wyne beperk, maar is trots dat hy al vyf jaar van die Top 100 SA Wines-beoordeel het, vanjaar vir die vierde jaar die keuring en beoordeling van die Nederburg-veilingwyne sal behartig, en verlede jaar die spreker by die White Blends Conference en Kingdom of Cabernet by Cape Wine 2015 was.

Sy stokperdjies (wat nie aan wyn verwant is nie) sluit onder meer perdry, skiet, gholf, swem en rugbykyk in. Hy is mal oor ’n lekker braai as die Britse weer dit toelaat en hy versamel boeke oor Afrika se koloniale ontdekking en geskiedenis.

Hy en sy broer en goeie vriend, Mike Berriman, het ook al wyn gemaak: die Sherwood Berriman, ’n klassieke rooi van ’n koeler klimaat by High Constantia. Hulle het drie oesjare gemaak en toe ’n ruskans geneem. Hulle is baie trots op die 2004 cabernet sauvignon / cabernet franc wat 91/100 in Wine & Spirits Magazine in die VK behaal het. “Selfs Eben Sadie het op rekord gesê dis die beste Bordeaux-versnit wat hy al van Constantia geproe het. Ek koester steeds daardie e-pos!”

Die driemanskap het ook onlangs drie vate Sherwood Swartland-shiraz 2013 van druiwe uit die Malmesbury-distrik gemaak.

Greg is getroud met ’n Engelse roos, Nicky, en is mal oor hul twee seuns, Sam en Louis.

Saterdag word 10 verskillende dagfunksies op Ataraxia, La Vierge, Storm Wines, Creation, Bouchard Finlayson,  Hamilton Russel Vineyards, Newton Johnson, Domaine des Dieux, Sumaridge en Whalehaven gehou en die fees word Saterdagaand by Spookfontein se ELL met ’n PiNot partytjie – enige wyne behalwe Pinot Noir – afgesluit.

Volgende jaar se Pinot Noir is op 27 en 28 Januarie 2017.

Teks: Maryke Roberts

Foto’s: Clifford Roberts

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top