Einstein-kompetisie: Kortlys

  • 2
kortlys600

Watter navorsers het in die Einstein-kompetisie uitgeblink? Lees die kortlys van 30 inskrywings hier onder.

 

LitNet Akademies kondig hiermee met trots die kortlys vir die Einstein-kompetisie aan.

Van nagraadse studente tot dosente, van Afrikaans tot wiskunde – ʼn groot verskeidenheid studierigtings en -vlakke is deur jong Suid-Afrikaanse navorsers van universiteite binne én buite Suid-Afrika verteenwoordig.

Baie dankie aan al die navorsers wat hul interessante temas met die publiek gedeel het. Dit was ʼn byna onmoontlike taak om ʼn kortlys uit die 212 inskrywings saam te stel. 

Die meeste inskrywings het voldoen aan die Einstein-kompetisie se uitdaging, naamlik: Hoe sou jy jou navorsingstema in 130 karakters aan die man en vrou op straat verduidelik? 

Daarby het die beoordelaars die inskrywings ook op grond van die volgende kriteria beoordeel: 

(1) helderheid (weet die leser wat die spesifieke studie se navorsingstema is en verstaan die leser waaroor die navorsing gaan?) 
(2) gehalte (is die navorsingstema interessant, oorspronklik en/of relevant?) 
(3) formulering (lees die opsomming vlot?)
(4) kreatiewe aanbieding (trek dit jou aandag?) 

Die LitNet Akademies-beoordelaarspaneel sal die wenners van drie groot kontantpryse aanwys. Ons hou duim vas vir hierdie 30 slim jong navorsers. 

• Inskrywings is volgens departement- en/of sentrumname alfabeties gerangskik. Klik op die navorser se naam vir verdere besonderhede. 

 

Afrikaans en Nederlands
• Anoniem in ʼn digitale era? Jou unieke skryfstyl gee jou dalk net weg. #Outeurskapidentifikasie #Forensieselinguistiek #EinstKomp – Mariska Nel

Algemene Taalwetenskap 
• Verstaan hulle werklik? (Nie)verbale terugvoer van pasiënte tydens pretoets-MIV-berading in landelike Wes-Kaapse dagklinieke. – Janina Theron

Astrofisika
• Radioteleskope vang neutronsterre se seine, maar die bakens langs hulle ruimtereis is onbekend – ek ontgin die versteekte reisplan – Marisa Geyer

Belasting
• Ek wil bewys: klei is nie net nat stof nie. Dit verdien dieselfde belastingvoordele as goud, diamante en ander minerale. – Christine Fourie

Beroepshigiëne
• Van ganspote tot vliegtuigvlerke, maar hou 3D-drukwerk nadele vir die mens en omgewing in? – Sonette du Preez 

Bewaringsekologie en Entomologie  
• Matthee: Die Bos is ʼn lewende entiteit; ons moet dit respekteer en bewaar. Kan insekte ons help om haar uitdaging te verstaan? – Rudi Swart

Chemie
• Verbeel jou jy het ʼn battery gevul met poeier wat oormaat krag op die kragnetwerk kon stoor en later gebruik. Ek maak die poeier … – Stefaans Gerber

Dierkunde en Entomologie
• Ek is die luistervink tydens miskruiers se chemiese geflikflooi en ontrafel só hoe hulle sedert die oerjare flankeer. – Anneke Schoeman

Ekonomie 
• Wie was die Jannie Mouton van die agtiende-eeuse Kaapkolonie? Al ooit gehoor van Jacob van Reenen en Jan Meindert Kruywagen? – Christie Swanepoel

Ekonomiese en Bestuurswetenskappe
• Van e-pos tot kitsboodskap, van die Kaap tot in Kaïro. Kan ek sien hoe jy voel? Emosies in die hedendaagse organisasie. – Maryke Fouché

Genetika
• Vang fungusinfeksies in wingerde met die broek op die knieë deur gebruik te maak van ʼn “klikbek”-biosensorplant. – Henry Janse van Rensburg
• Angstig oor angstigheid? Angs en stressteurings in ʼn Suid-Afrikaanse konteks #EinstKomp
Nathaniel McGregor

Geskiedenis 
• Suid-Afrika se Antarktiese geskiedenis: louwarm politiek op ʼn witwarm kontinent.
– Lize-Mariè van der Watt  

Ingenieurswese 
• Papierafval tot bruikbare sellulose so groot soos miljoenstes van ʼn millimeter – verterende ensieme in aksie! – Lia Bester
• Masjiene is maklik; mense is moeilik. Hoe spoor ʼn mens werknemers aan? Hier is die antwoorde in 'n neutedop soos nooit tevore! – Erik Loots 

Internasionale Studies-groep
• ʼn Kliek skatryk buitelanders wil die president en sy regering kaap. Nee, dit is nie SA 2016 nie, dit is die Transvaal 1886–1899. – Lindie Koorts 

Kriminologie
• Mense het ʼn probleem daarmee dat dit nie ʼn probleem is dat so baie jongmense “sext” nie – en dis ʼn probleem! – Melissa Meyer

Linguistiek
• 400 jaar van Suid-Afrikaanse vertaling: vertaling as spieëlbeeld en geheime agent van mag en ideologie. – Maricel Botha

Linguistiek en Taalpraktyk
• Wie skryf wat op die muur en waarom? ʼn Gevallestudie van die bepalende faktore by geskrewe taalkeuses in die openbare ruimte. – Chrismi-Rinda Loth   

Molekulêre Biologie en Mensgenetika 
• TB vermoor sonder vooroordeel van mens tot grootwild, maar binnekort is dit iets van die verlede. Superheld gevind! – Wynand Goosen 

Musiek 
• Soos die kurwe van ʼn brander op die Goue Snit ry, so ontvou die klaviermusiek van Claude Debussy. – Nina Phillips  

Omgewingswetenskappe 
• Dit kom van ver af – plastiek en swaar metale in korale van tropiese eilande in die Indiese Oseaan. – Veronica van der Schyff  

Plantproduksie en Grondkunde
• Besproeiingskedulering: Boere is nat agter die ore wanneer dit kom by die nuutste tegnologie in waterbesparing. – Theunis Smit

Regte
• Sosiale media gee aanlynnuus vlerke. As die storie oor jou gaan, beskerm die reg jou genoeg? En as die joernalis jou belaster? – Helene Eloff 
• Mag boewe stem? Beperking van stemreg van gevangenes in demokratiese samelewings: Vergelykende studie van RSA, VSA & VK #EinstKomp – Werner Pretorius   

Sielkunde 
• Die huishulp: lank ná apartheid steeds onderaan die Suid-Afrikaanse voedselketting; maar wat sien sý wanneer sy in die spieël kyk? – Elcke du Plessis 
• Die era van die afwesige vader: Maak pappas saak? Kwaliteit-pa-seun-verhoudings as ʼn faktor in geweldsmisdaadbekamping. – Zibeth Hansen

Teologie
• Die woestyn in die stad: Is die beoefening van stilte en nadenke nog belangrik in ʼn verstedelikte en Christelike gemeenskap? – Fredrick Kotzé

Veekundige Wetenskappe 
• Indien die hoender op jou bord grillerige vlieglarwes geëet het, kon dit dalk lei tot ʼn gesonder dier en nou ʼn gesonder jy? – Liesel van Emmenes

Wiskunde
• Hoe kom jy tot die punt as daar nie ʼn punt is nie? Die beskrywing van konvergensie van puntvrye rye. – Jacques Masuret

Al die inskrywings vir die Einstein-kompetisie kan hier gelees word.

 

la600einstein

  • 2

Kommentaar

  • Uitstekend! Dit gaan moeilik wees om 'n wenner te kies. Ek hou veral van Schoeman ("Ek is die luistervink tydens miskruiers se chemiese geflikflooi") en Masuret ("konvergensie van puntvrye rye"), maar daar is vele ander wat ook mooi is.

  • Reageer

    Jou e-posadres sal nie gepubliseer word nie. Kommentaar is onderhewig aan moderering.


     

    Top