die digter is nie doof nie
hy hoor die straatkind se honger soog
maar luister na die kneus in sy gebreekte oog
hy hoor die bedelaar se inkkaros roep
maar luister na die skuldstem op sy digterstoep
hy hoor die blinde skrik in ’n pikstiknag
maar luister na die mallemeulekleur
in sy dagliglag
hy hoor die doemprofeet se kyf
maar luister hoe hy sy naam in die
Boek van die Lewe inskryf
hy hoor die hoer se pers mond pruil
maar luister na haar noodroep wat
in die na-spel skuil
hy hoor die helhand op haar sagte wang klap
maar luister na die skaamte wat
uit haar lamlyf tap
hy hoor die mense murmureer oor moord
maar luister na elke bloedige woord
wat (pynlik) uit gefolterde penne loop
die digter is nie doof nie
hy luister
Kommentaar
Sussane Pike
Jou gebruik van hoor is so gepas. In Tswana verteenwoordig hoor al die sintuiglike waarnemings behalwe sien.
Jy hoor diep.
Wow, uitmuntend verwoord.
Jy is n vrou wat vat, jy is n vrou wat raakvat! Baie dankie.
HARTROEREND.
Wat 'n wonderlike gawe met woorde.
Jou insig en meelewing is aandoenlik.
Welgedaan Susanne Pike.