Die boosaardige broers Botha: ’n onderhoud met Adeline Radloff

  • 0

Die boosaardige broers Botha
Adeline Radloff
Tafelberg
ISBN: 9780624081883

Skrywers oor hul nuwe boeke: Adeline Radloff gesels met Naomi Meyer oor Radloff se Die boosaardige broers Botha

Waar het jy die idee(s) vir hierdie boek gekry?

Ek lees graag saans vir my kinders voor, maar stories vir kinders kan soms nogal vervelig (vir ouers) raak. Ek wou ’n kinderboek skryf met ’n bietjie “byt”: iets wat kinders op een vlak kan geniet en grootmense op ’n ander. Die boek dryf dus sagkens die spot met ’n paar eg Suid-Afrikaanse stereotipes wat elke Afrikaanse ouer sal erken (en hopelik sal laat glimlag).

Vertel my iets van die storie, asseblief.

Die Botha-broers is drie stereotiepe “tawwe” plattelanders: bosveldmanne wat weet hoe om te skiet, te dop en te baklei. Weens ’n dubbele tragedie moet hulle egter ’n hoogs begaafde stadskindjie grootmaak wat gemakliker voel met sy neus in ’n boek as met ’n geweer in sy hand. Die aanpassing is moeilik vir al die broers, veral toe die seuntjie boonop by die skool geboelie word.

Boosaardigheid en broers gaan dalk nie op die oog af saam nie, of hoe? Of is rusie en familie eintlik die heel beste pasmaats?

Rusie in familie is onvermydelik, maar as dié konflik uit liefde spruit, kan mens dit altyd oplos. So kom die drie oudste Botha-broers eers “boosaardig” voor – regte rowwe, growwe, onbeskofte, onbeskaafde wilde boere – maar uiteindelik blyk dit dat daar soveel meer as net dít onder die oppervlak skuil.

Gaan dit hier oor die boosaardigheid, of oor die broers? Of dalk oor die boelies - of oor Bulelani?

Uiteindelik gaan dit vir my oor die maniere waarop ons mekaar miskyk deur ons blind te staar teen stereotipes. Brom, Buskruit en Breker Botha moet leer dat Bulelani nie “verkeerd” is net omdat hy anders is as hulle nie. En Bulelani moet presies dieselfde les leer. Die boeliekwessie word op ’n baie lighartige manier hanteer – ’n tipe wensdenkery wat nie veronderstel is om ernstig opgeneem te word nie. (Asseblief tog!)

Vir watter ouderdomme lesers het jy hierdie boek geskryf?

Ek sou sê dis eintlik vir kinders so tussen vyf en tien jaar. Maar dis spesifiek ook geskryf vir ouers wat graag voorlees, so daar is alliterasie vir lekker hardop lees en ’n paar grappies wat kinders miskien sal mis.

Jy het 'n paar jaar gelede die Sanlamprys vir Jeuglektuur gewen, en toe 'n jeugboek saam met jou suster (Lili Radloff) geskryf. Waarom skryf jy jeugboeke?

My eerste boek, Sidekick, het die goue medalje in die Sanlamprys vir Jeuglektuur gewen en my tweede boek, Chain reaction, die silwermedalje. Die boek wat ek saam met Lili geskryf het, was (baie definitief!) op grootmense gemik. Ek geniet beide genres, en sal nie een bo die ander wil verkies nie.

Jy het al 'n magdom beroepe beoefen; wil jy iets hieroor sê? Wat was jou gunstelinge?

Nee genade, ek skaam my eintlik vir al my gerondvallery in die lewe. Die slegste werk wat ek nog ooit moes doen, was toe ek my moes voordoen as ’n “beauty consultant” in Harrrods en peperduur velprodukte aan mense moes afsmeer. (Terloops, dis alles blote oëverblindery, maak nie saak hóé duur daai glasbotteltjie is nie – tot vandag toe gebruik ek net goedkoop Clicks-produkte.) Die lekkerste was toe ek moes help ontbyt maak in ’n Edinburgh-hotel (brood rooster, botter krul, koffie maal ...) en elke dag ’n ete gekry het wat deur ’n Michellin-stersjef voorberei is.

Het jou verskillende terreine van lewenservaring jou idees gegee vir jou boeke (en vir nog boeke)? Of waar kom jou inspirasie vandaan?

Ek het geen idee waarom nie, maar my kop wemel nog altyd van al die stories wat ek wil vertel. Die stories borrel sommer so van orals uit. Ek sê altyd ek is eerder ’n gebore storieverteller as ’n gebore skrywer – as ek net nie so met die geskrewe woord moes worstel nie, sou ek elke dag ’n nuwe storie wou vertel.

Wat lees jy?

Ek lees alles. Letterlik alles: niefiksie, literêre romans, speurverhale, “classics”, liefdesverhale, digbundels, jeugverhale, kinderboeke, fantasie, selfhelp, resepteboeke, woordeboeke ...

Skryf jy aan nog iets?

Ek is juis nou besig om Die Skandalige Susters Smit klaar te maak. 🙂

  • 0

Reageer

Jou e-posadres sal nie gepubliseer word nie. Kommentaar is onderhewig aan moderering.


 

Top