Vermaak | Entertainment > Visueel | Visual > Foto's | Photos

<< Terug | Back

2009-10-28

Druk dit/Print it

E-pos hierdie skakel/E-mail this link

Etienne van Heerden het die N1 Noord geneem om die Boekbedonnerd-fees in Richmond in die Karoo by te woon en saam met skrywers soos Stephen Gray, Rian Malan, Fanie Olivier, Riana Scheepers en Eben Venter op te tree.

Foto’s en onderskrifte: Etienne van Heerden

Ek was in Junie laas in die Karoo en was gretig om die Niet in die oë te kyk.
Richmond se hoofstraat het wakker geskrik toe ons klomp skrywers daar aankom!	Die NG-kerktoring, toegerus met spesiale luidsprekers vir die okkasie, het onkerklike musiek oor die hoofstraat uitgeblaker. Ek hoor dit het glo nogals lank geneem om die nodige verlof by die kerkvaders te kry ...
Voor Riana Scheepers se optrede: Johann Loubser, Riana Scheepers, Eben Venter, Suzette Kotzé en Wynand Coetzer, wie se debuutroman, Skerpioen, pas verskyn het. Eben se honde het hom oral vergesel.
Darryl David, ywerige feesorganiseerder en dosent in Afrikaans aan die Universiteit van KwaZulu-Natal, open ’n vroeë sessie in die Richmond-stadsaal.
Eben Venter gesels met ’n leser kort voordat hy weer vir ’n jaar na Australië vertrek. Links staan Boekbedonnerd-organiseerder Darryl David.
Plaaslike skaapboer en seremoniemeester Hendrik Ackerman, Dana Snyman en Darryl David.	Fanie Olivier (met Olive Schreiner skuins agter hom) het aangrypend gepraat oor sy digbundel apostroof, wat eersdaags verskyn. Die gedigte handel oor sy vrou Rike (Antonissen), wat aan ’n rare siekte oorlede is. Ek het die sprankelende Rike (dogter van die beroemde Rob Antonissen) geken en was skoon aangedaan.
Drie romanskrywers tussen praatsessies: Etienne van Heerden, Kirby van der Merwe en Eben Venter. Die foto is deur 'n onbekende feesganger geneem.	Twee lesers kyk ’n skrywer agterna ...
Richmond se slangvanger was ook daar ... Die slange was rustiger as sy bewende hande.
Op die stoep: Tymon Smith van die Sunday Times en skrywer Rian Malan.
Kirby van der Merwe, soos ek hom aangetref het, ingedagte op ’n stoep. Hy moet ’n artikel vir By skrywe oor die dorp en die fees en sê daar’s net een goeie manier om navorsing te doen: sit tjoepstil en wawyd wakker op een plek en wag.
Laat Saterdagnag: Grahamstadse skilder Julia Skeen, romansiers Kirby van der Merwe en Etienne van Heerden, akademikus Heidi de Villiers, digter Fanie Olivier, romansier Eben Venter en digter Chris Mann.
’n Eetplek laatnag, met ’n operasanger/kelner wat tussen disse ’n hoë C haal en ’n vloerbestuurder-met-kaalkop-en-swart-voorskoot so reg uit Parys se Linkeroewerbuurt – en dit als in die middel van die Groot Karoo.	Digter en organiseerder van Grahamstad se Wordfest, Chris Mann, en sy vrou, die skilder Julia Skeen.
Hoed op die knie sit romansier Piet Haasbroek en luister.
Digter Stephen Gray het pas boeke aangeskaf by een van Richmond se 14 (ja, veertien) tweedehandseboek-winkels, al dorp in die Karoo – waarskynlik in die land – met meer boekwinkels as drankwinkels en/of slaghuise ...	Boekbedonnerd-organiseerder Peter Baker, ’n Kanadese veearts wat ses maande van die jaar in Johannesburg woon en die ander ses maande in die Karoo terugploeg.
Vroegoggend, dwalend deur die strate, kry ek ’n Richmondse skaaphondteler wat sy honde in 'n stofstraat afrig.